На Ганцаўшчыне выяўлены парушэнні міграцыйнага заканадаўства

У Ганцавічах і Ганцавіцкім раёне напрыканцы верасня быў праведзены асноўны этап спецыяльнага комплекснага мерапрыемства “Нелегал”. Яго мэта — супрацьдзеянне незаконнай міграцыі, уключаючы гандаль людзьмі.

Падчас правядзення мерапрыемства выяўлены два парушэнні міграцыйнага заканадаўства: за парушэнне парадку занятку працоўнай дзейнасцю ў нашай краіне прыцягнуты грамадзянін Рэспублікі Таджыкістан, а за выкарыстанне замежніка для занятку працоўнай дзейнасцю з парушэннем устаноўленага парадку прыцягнуты грамадзянін Рэспублікі Беларусь. А вось грамадзянку Расійскай Федэрацыі высылка з Беларусі чакала за парушэнні грамадскага парадку.

Звяртаю ўвагу, што працоўную дзейнасць у нашай краіне працаўнікі-імігранты могуць ажыццяўляць толькі пасля атрымання спецыяльнага дазволу на права занятку працоўнай дзейнасцю ў рэспубліцы і заключэння працоўнага дагавора. Спецыяльны дазвол выдаецца замежніку па хадайніцтве наймальніка Рэспублікі Беларусь.

Нагадаю, што замежнік абавязаны на працягу пяці сутак, акрамя нядзель, дзяржаўных святаў і святочных дзён, якія аб’яўлены Прэзідэнтам непрацоўнымі, зарэгістравацца ў органе рэгістрацыі па месцы свайго часовага знаходжання.

На працягу 30 дзён з дня заезду ў Рэспубліку Беларусь могуць знаходзіцца без рэгістрацыі грамадзяне Рэспублікі Казахстан, Латвійскай, Літоўскай і Эстонскай рэспублік, Украіны, а да 90 сутак — грамадзяне Расійскай Федэрацыі (у адпаведнасці з міжнароднымі дагаворамі Рэспублікі Беларусь).

Замежнікі, якія знаходзяцца ў Беларусі, абавязаны выконваць і паважаць Канстытуцыю Рэспублікі Беларусь і іншыя акты заканадаўства краіны, яе нацыянальныя традыцыі (у адпаведнасці з артыкулам 22 Закона Рэспублікі Беларусь ад 4 студзеня 2010 года).

Рэгіна МАНЮК,

начальнік аддзялення па грамадзянстве і міграцыі Ганцавіцкага РАУС.

Мовай лічбаў

За мінулы перыяд 2017 года за парушэнні грамадскага парадку Ганцавіцкім РАУС высланы з Рэспублікі Беларусь 3 замежныя грамадзяніны (2 — з Расійскай Федэрацыі, 1 — з Украіны). Грама-дзяніну Украіны адмоўлена ў заездзе ў Рэспубліку Беларусь. Усяго да адміністрацыйнай адказнасці за парушэнне міграцыйнага заканадаўства прыцягнуты 12 асоб, па выніках разгляду спраў аб адміністрацыйных правапарушэннях накладзены штраф на суму 494,4 рубля.

Сярод пастаянна пражываючых на тэрыторыі Ганцавіцкага раёна замежнікаў — 201 грамадзянін Расійскай Федэрацыі, 93 грамадзяніны Украіны, 12 — Рэспублікі Арменія, 5 — Рэспублікі Казахстан, па 4 грамадзяніны Рэспублікі Малдова, Дзяржавы Ізраіль, Туркменістана і Рэспублікі Таджыкістан, па тры грамадзяніны Рэспублікі Узбекістан і Турэцкай Рэспублікі, 2 грамадзяніны Латвійскай Рэспублікі і па 1 грамадзяніне Азербайджанскай Рэспублікі, Манголіі і Літоўскай Рэспублікі.

Па асабістых справах зарэгістравана 205 замежных грама-дзян, з іх 98 — у гасцініцы “Журавушка”. Наведвалі раён і былі зарэгістраваны ў АГіМ Ганцавіцкага РАУС грамадзяне Каралеўства Нідэрланды, ФРГ, Каралеўства Марока, Італьянскай Рэспублікі, ЗША, Рэспублікі Польшча, Аўстрыйскай Рэспублікі, Каралеўства Швецыя і іншыя.