Каманда КПД — пераможца “Вертыкалі-2017”

У мінулую суботу ў Ганцавічах прайшла раённая спартакіяда “Вертыкаль”. Прадстаўнікі прадпрыемстваў, арганізацый і ўстаноў раёна спаборнічалі ў некалькіх спартыўных відах: валейболе, шахматах (гэтыя спаборніцтвы прайшлі 30 верасня), міні-футболе, настольным тэнісе, дартсе, рускіх шашках і велаэстафеце.

Сёлета ўдзел у спартакіядзе прынялі адразу 27 каманд. Як і заўсёды, “Вертыкаль” падарыла спартсменам і гледачам шмат станоўчых уражанняў. І, нягледзячы на тое, што спаборніцтва праходзіла ў добразычлівай і сяброўскай атмасферы, разгарнулася ўпартая барацьба за прызавыя месцы.

У валейбольным турніры пераможцай стала каманда райвыканкама, на другім месцы аказалася каманда РАУС, на трэцім — каманда ПМК-14.

Лепшымі ў турніры па шахматах сталі прадстаўнікі Ганцавіцкага КПД, другое месца занялі шахматысты РЖКГ, трэцяе — ЦРБ.

У турніры па рускіх шашках перамогу святкавалі спартсмены з РЖКГ. Другую прыступку п’едэстала занялі работнікі КПД, а трэцюю — ПМС.

Пераможцамі турніру па дартсе сталі спартсмены райспажыўтаварыства, другое месца — на рахунку хлебазавода, трэцяе — ЦРБ.

У міні-футбольным турніры не было роўных камандзе райвыканкама, на другім месцы аказаліся прадстаўнікі лясгаса, а на трэцім — каманда РАУС.

Перамогу ў тэнісным турніры заваявалі спартсмены РАУС, другімі сталі тэнісісты РЖКГ, трэцімі — КПД.

Без перабольшвання, велаэстафета — адзін з самых захапляльных відаў спартакіяды. Адметна, што, згодна з палажэннем, удзел у велаэстафеце абавязкова павінен прыняць кіраўнік арганізацыі, прадпрыемства ці ўстановы або яго намеснік. У выніку пераможцамі эстафеты сталі веласіпедысты РАУС, другое месца — на рахунку КПД, трэцяе месца занялі прадстаўнікі РЖКГ.

Па традыцыі, пасля апошняга турніру ў гарадскім Доме культуры для ўдзельнікаў “Вертыкалі” быў арганізаваны святочны канцэрт, пасля чаго адбылася цырымонія ўзнагароджання. Старшыня райвыканкама Уладзімір Бялоў і галоўны спецыяліст аддзела адукацыі, спорту і турызму райвыканкама Дзмітрый Матуліс уручылі пераможцам і прызёрам спартакіяды кубкі, медалі і граматы. Напрыканцы ўрачыстасці раскрылася галоўная інтрыга: спартсмены якой арганізацыі сталі лепшымі ў агульнакамандным заліку? Пераможцай трэці год запар аказалася каманда КПД (НА ЗДЫМКУ), другое месца — у каманды райвыканкама, трэцяе месца заняла каманда РЖКГ.

Вікторыя ПРЫКОТА.

Фота аўтара.