З аператыўных зводак РАУС

“Паквапіўся” на тэлефон

2 кастрычніка па матэрыяле Ганцавіцкага РАУС была ўзбуджана крымінальная справа ў адносінах да жыхара вёскі Дзяніскавічы 1967 года нараджэння. 22 верасня мужчына ўкраў пакінуты ў зале чакання чыгуначнай станцыі Ганцавічы мабільны тэлефон, чым нанёс яго ўладальніцы, жыхарцы райцэнтра, матэрыяльны ўрон на суму 152 рублі.

Беражыцеся зладзеяў!

3 кастрычніка па матэрыяле РАУС у адносінах да 21-гадовага ганцаўчаніна ўзбуджана крымінальная справа. 12 верасня мужчына ўкраў пыласос з кватэры па вул. Заводскай.

У гэты ж дзень узбуджана крымінальная справа ў адносінах да неўстаноўленай асобы, якая ад магазіна “24 гадзіны” Ганцавіцкага райспажыўтаварыства 29 верасня ўкрала веласіпед маркі “Аист”, які належыць жыхарцы Ганцавіч.

Пранік у аўтамабіль

У мінулую суботу ў Ганцавіцкі РАУС звярнуўся жыхар вёскі Ганцавічы 1996 года нараджэння. Мужчына расказаў міліцыянерам, што неўстаноўленая асоба 7 кастрычніка з 20.55 да 21.05 пранікла ў салон аўтамабіля “Пежо-406”, пакінутага на стаянцы ў двары дома № 3 па вул. Кастрычніцкай у райцэнтры. У выніку быў украдзены заплечнік, у якім знаходзіліся 200 долараў ЗША, паляўнічы нож з чахлом, пашпарт, два пасведчанні на імя гаспадара, звязак ключоў, адзін ключ і святлодыёдны ліхтарык. Матэрыяльны ўрон, нанесены гаспадару аўтамабіля, — 240 беларускіх рублёў і 200 долараў ЗША.

Братэрскія разборкі з нажом

8 кастрычніка па матэрыяле РАУС была ўзбуджана крымінальная справа па паведамленні ад 7 кастрычніка з бальніцы. У гэты дзень ва ўстанову аховы здароўя паступіў жыхар вёскі Хатынічы 1967 года нараджэння. Мужчыне быў пастаўлены дыягназ: “пранікаючая колата-рэзаная рана пярэдняй брушной сценкі злева”. Следча-аператыўная група высветліла, што цялесныя пашкоджанні (не менш чым адзін удар у вобласць жывата) мужчыне падчас сумеснага распіцця спіртных напіткаў нанёс родны брат 1972 года нараджэння, з якім яны пражываюць разам. Прычына крывавай разборкі — асабістыя непрыязныя адносіны.

Зводкі чытала Вікторыя ПРЫКОТА.