На КПД новы дырэктар (абноўлена)

На мінулым тыдні назначаны і прадстаўлены працоўнаму калектыву новы дырэктар Ганцавіцкага камбіната панэльнага

— Мікалай Мікалаевіч, усё ж такі дзейнасць у сферы перавозак і вытворчасці будаўнічай прадукцыі адрозніваюцца…

— Пачну з таго, што па адукацыі я эканаміст-менаджар, закончыў Брэсцкі дзяржаўны ўніверсітэт імя А. С. Пушкіна. Працаваў у свой час дырэктарам ліцэя ў Лунінцы, узначальваў, як ведаеце, і ўчастак аўтапарка ў Ганцавічах. Справа ў тым, што кіраўнік прадпрыемства ці арганізацыі, у першую чаргу, адміністратар, які павінен арганізаваць эфектыўную работу. А складаючыя поспеху ўсюды адны і тыя ж. На маю думку, гэта якасць, ахова працы — ад дысцыпліны да стварэння належных яе ўмоў і эканамічны паказчык. У бюджэтнай сферы — рацыянальнае выкарыстанне сродкаў, на вытворчасці — яе рэнтабельнасць. Як бачыце, усё гэта актуальна і для КПД. Над якасцю прадукцыі працуем штодня, работа па стварэнні належных умоў працы вядзецца — адкрыццё той жа сталовай — таму прыклад, а рэнтабельнасць будзе залежыць ад правільнасці прымаемых рашэнняў як па цэнавай палітыцы так і ад арганізацыі вытворчасці і рацыянальнага выкарыстання ўсіх рэсурсаў.

—  Але разам з гэтым павінна быць і бачанне перспектывы развіцця прадпрыемства…

— Безумоўна. Нельга разлічваць толькі на дзяржзаказ па будаўніцтве шматкватэрных дамоў. Прадпрыемству неабходна і дадатковая вытворчасць. Напрыклад, разам з узвядзеннем дамоў усюды праводзяцца работы і па добраўпарадкаванні тэрыторый, а, значыць, запатрабавана і такая прадукцыя як тратуарная плітка і бардзюрны камень. І тут якраз ёсць магчымасці атрымаць для прадпрыемства дадатковы прыбытак. Зразумела, што неабходна адпаведнае абсталяванне. Размова ідзе якраз аб тым, што грошы трэба не праядаць, а ўкладваць з розумам і лічыць кожную капейку. А што датычыцца сённяшняга дня, дык працуем па камплектацыі дамоў у Валожынскім раёне Мінскай вобласці, Баранавіч, Лунінца і Іванава. Таксама заключаны дагавор на ўзвядзенне яшчэ аднаго дома ў Баранавічах.

— А з прыходам новага дырэктара ці не плануецца якая-небудзь аптымізацыя калектыву?

— Штат прадпрыемства залежыць ад таго наколькі калектыў эфектыўна працуе. Зараз на камбінаце шчыруюць 234 работнікі, з якіх 43 — інжынерна-тэхнічны персанал. Магчымы перастаноўкі, але ў цэлым аб ніякім скарачэнні размовы быць не можа, ды і мая задача, як дырэктара, у тым ліку, даць работу людзям, аб чым мы ўжо згадвалі. А гэта сумесная работа, тым больш, што прадпрыемства з’яўляецца структурным падраздзяленнем КУП “Брэстжылбуд”. Будзем працаваць у цесным кантакце са спецыялістамі галаўнога прадпрыемства і, безумоўна, чакаю ініцыятывы на месцы. У нас жа калектыў даволі малады і, думаю, усе зацікаўлены, каб прадпрыемства эфектыўна працавала і выйшла на больш высокі ўзровень гаспадарання. У выніку ад гэтага залежыць і заработная плата кожнага з нас. І спадзяюся, што сумеснымі намаганнямі камбінат панэльнага домабудавання ў будучым стане вытворчым лідарам на Ганцаўшчыне і па праве — горадаўтваральным прадпрыемствам. У нас для гэтага ўсё ёсць!

Гутарыў

Павел Свістуновіч.