З АПЕРАТЫЎНЫХ ЗВОДАК ТЫДНЯ: бойка на вытворчасці, крадзеж тэлефона і…самагонкі

Бойка на вытворчасці

2 лістапада ўзбуджана крымінальная справа ў адносінах да жыхара вёскі Вялікія Круговічы, 1984 года нараджэння, які працуе майстрам на СТАА “Аластрэ”. 11 жніўня 2015 года мужчына знаходзіўся ў вытворчым цэху СТАА “Аластрэ”. Груба парушаючы грамадскі парадак і спакой грамадзян, выказваючы непавагу да грамадства, ён беспадстаўна нанёс не менш чым два ўдары кулакамі ў твар рабочаму СТАА “Аластрэ”, жыхару вёскі Хатынічы, 1992 года нараджэння. Хуліган прычыніў пацярпеламу цялесныя пашкоджанні, якія адносяцца да ліку лёгкіх і якія пацягнулі за сабой кароткачасовыя праблемы са здароўем.

Прывабіла спіртное…

У аўторак, 3 лістапада, узбуджана крымінальная справа ў адносінах да неўстаноўленай асобы, якая ў перыяд часу з 25 кастрычніка па 2 лістапада 2015 года з дома № 17 па вул. Лугавой у в. Задуб’е ўкрала, як паведаміла пацярпелая, 9 бутэлек гарэлкі і 1,5 літра самагонкі. Матэрыяльная шкода ацэнена ў 505 тысяч рублёў.

Хто забіў бабра?

Таксама 3 лістапада ў міліцыю звярнулася жыхарка г. Ганцавічы. Яна паведаміла аб тым, што на 9-м кіламетры аўтадарогі Р-105 “Ганцавічы — Лагішын” у лясным масіве яна знайшла два мяхі. У адным з іх знаходзілася туша бабра, у другім — дзве металічныя пасткі.

Падрабязнасці высвятляюць у РАУС.

Ізноў самагоншчык

3 лістапада а сёмай гадзіне вечара паступіў рапарт малодшага ўчастковага інспектара міліцыі аб тым, што ў 18 гадзін 25 хвілін у ходзе санкцыянаванага агляду ў адной з кватэр у райцэнтры выяўлена 30 літраў самагоннай брагі, а таксама 0,5 літра самагонкі.

Праверку праводзіць РАУС.

Крадзеж тэлефона

6 лістапада ўзбуджана крымінальная справа ў адносінах да невядомага. Ён у перыяд з 19 да 22 гадзін 17 верасня 2015 года наўмысна ўкраў з рукзака, які знаходзіўся ў спартыўнай зале прафліцэя сельскагаспадарчай вытворчасці, мабільны тэлефон “Philips X1560 Xenium”, які належыць грамадзяніну П. Злачынца нанёс пацярпеламу матэрыяльную шкоду на суму 850 тысяч рублёў.