КАЛІ ПАНУЕ ДАВЕР

У надзвычай маляўнічых мясцінах нашай Ганцаўшчыны, сярод спрадвечных гаманлівых лясоў размясціліся вёскі Ліпск і Задуб’е. Але яны і адны з найбольш аддаленых ад райцэнтра населеных пунктаў, больш чым сорак кіламетраў аддзяляюць іх ад горада. Як жывуць тут вяскоўцы? З якімі праблемамі сутыкаюцца ў паўсядзённым жыцці? Ці не абдзелены ўвагай органаў мясцовай улады? Высветліць гэтыя пытанні дапамагаюць сходы па месцы жыхарства, якія і прайшлі тут у мінулую сераду.

Ужо нават па тым, што ў мясцовыя ўстановы культуры на сустрэчу з прадстаўнікамі розных службаў раёна завіталі ў асноўным людзі пажылога

ўзросту, было зразумела: час унёс свае нежаданыя змены ў гэтыя вёсачкі, яны, як гэта ні балюча ўсведамляць, старэюць. І пацвярджэннем гэтаму сталі названыя старшынёй Малькавіцкага сельвыканкама Нінай Буйкевіч лічбы: у Ліпску са 199 пастаянна пражываючых жыхароў 101 пенсіянер і 76 чалавек працаздольнага ўзросту. У Задуб’і з 282 чалавек — 112 пенсіянераў. І ў адной, і ў другой вёсках зусім мала жыве людзей, маладзейшых за працаздольны ўзрост. А значыць, перспектыва гэтых вёсак пакуль несуцяшальная. Здавалася б, і гэта, і значная аддаленасць ад райцэнтра, і праблемы пажылога ўзросту маглі б стаць падставай для песімістычнага настрою вяскоўцаў, выклікаць тыя ці іншыя нараканні ці прэтэнзіі. Аднак, што прыемна ўразіла і напоўніла сэрца пачуццём асаблівай павагі да гэтых людзей, яны ўзважана, з сялянскай мудрасцю ўспрымаюць рэчаіснасць, умеюць зацікаўлена, тактоўна, уважліва слухаць субяседнікаў, спакойна, прадумана задаваць пытанні, уносіць прапановы і гэтак жа слухаць адказы на іх. Культура зносін — вось што вылучае жыхароў гэтых лясных вёсачак. А таму і сустрэчы прайшлі тут у атмасферы даверу. Вяскоўцы атрымалі цікавую інфармацыю ад прадстаўнікоў розных раённых службаў, а таксама шэраг карысных парад ад іх.

У Ліпску вялася размова аб аўтобусных зносінах з райцэнтрам. Зараз сюды, як, дарэчы, і ў Задуб’е, рэйсавы аўтобус ходзіць тры разы на тыдзень: у пятніцу, нядзелю і панядзелак. Такое рашэнне было прынята на сходзе па месцы жыхарства летась. Канешне ж, усім хацелася б, каб аўтобус курсіраваў часцей. Але абгрунтаваныя лічбы, прыведзеныя начальнікам участка “Ганцавічы” філіяла АП № 10 г. Лунінца Мікалаем Паўловічам, сведчылі: рэйсы — стратныя. Людзі разумеюць гэта, не маюць нараканняў на культуру абслугоўвання вадзіцеляў, на захаванне раскладу руху аўтобусаў. Але ад адной з жанчын у Ліпску паступіла прапанова змяніць дні курсіравання рэйсавага аўтобуса, у прыватнасці, перанесці яго з панядзелка на суботу. Па гэтай прапанове ўзніклі ў вяскоўцаў рознагалоссі. Але тут жа, без гучных спрэчак, вынеслі пытанне на галасаванне і пакінулі дні руху аўтобуса без змен.

Аб супрацьпажарнай абстаноўцы ў раёне расказаў прысутным на сходах намеснік начальніка раённага аддзела МНС Дзяніс Фесюк. Ён назваў асноўныя прычыны пажараў, параіў строга захоўваць супрацьпажарныя меры, асабліва ў час веснавых палаў, даў кансультацыю па бяспечным спальванні смецця, прапанаваў устанаўліваць у дамах апавяшчальнікі.

Участковы інспектар Вячаслаў Корзун і старшы інспектар крымінальна-выканальніцкай інспекцыі РАУС Сяргей Шуляк ахарактарызавалі стан правапарадку, папрасілі вяскоўцаў берагчы сваю маёмасць, аказваць садзеянне праваахоўным органам у прафілактычнай рабоце.

Аб сістэме аховы здароўя раёна расказаў вяскоўцам намеснік галоўнага ўрача райбальніцы Віктар Анікевіч. І ў Ліпску, і ў Задуб’і зараз няма фельчараў, але людзі не застаюцца без медыцынскага абслугоўвання. Урач Малькавіцкай участковай бальніцы Дзіна Дзенісеня адзін раз на тыдзень прыязджае ў гэтыя вёскі, вядзе прыём насельніцтва. Цёплыя словы ўдзячнасці выказвалі на сходзе вяскоўцы ў адрас гэтага маладога спецыяліста. Чулая, уважлівая, спагадлівая — так аднагалосна гаварылі яны пра Дзіну Сяргееўну. Менавіта з падзякі ёй і пачала размову з прадстаўнікамі раённых службаў жыхарка вёскі Задуб’е Ганна Шпандарук. Яе шчыра падтрымалі вяскоўцы.

Нельга было не звярнуць увагу і на цесны кантакт з насельніцтвам гэтых вёсак старшыні Малькавіцкага сельвыканкама Ніны Буйкевіч. Тут жа, на сходах, яна высвятляла надзённыя пытанні, не толькі заклікала ўсіх да навядзення чысціні і парадку, але і адразу прапанавала вызначыць дні масавай уборкі ў гэтых вёсках і атрымала падтрымку вяскоўцаў.

Як стала вядома, у Ліпску ў чацвер людзі дружна выйшлі на суботнік.

На сходах прысутнічала Марыя ШЧАЎКУН.