Першацвет знішчаць забараняецца!

Пад ласкавымі промнямі сонца ажывае прырода, зелянее трава, зацвітаюць першыя кветкі.

Ганцавіцкая міжраённая інспекцыя аховы жывёльнага і расліннага свету нагадвае, што ў Беларусі растуць такія першацветныя, як ветраніца лясная, сон-трава, пячоначнік высакародны, падснежнікі і пралескі, ландыш майскі і іншыя. Раннія цвітучыя расліны — упрыгажэнне нашых вясенніх лясоў, але колькасць іх няўмольна скарачаецца. Таму ў цяперашні час асабліва востра паўстае праблема іх аховы. Акрамя таго, да першацветных адносяцца расліны, якія занесены ў Чырвоную кнігу Беларусі.

З сярэдзіны красавіка да канца мая на рынках можна сустрэць свежую чарамшу (мядзведжую цыбулю) — вострапахучае зяленіва, якое мае знешняе падабенства з ландышам і па смаку нагадвае часнок. Аднак не ўсе грамадзяне ведаюць, што чарамша — рэдкая расліна, занесеная ў Чырвоную кнігу Беларусі, і яе збор забаронены. Менавіта неабмежаваны збор і вытоптванне прывяло да скарачэння месцаў, дзе расце мядзведжая цыбуля.

У адпаведнасці з артыкулам 24 Закона Рэспублікі Беларусь “Аб раслінным свеце”, самавольнае знішчэнне і перасадка дзікарослых раслін, якія адносяцца да відаў, уключаных у Чырвоную кнігу Рэспублікі Беларусь, з прыроднага асяроддзя, іх незаконны абарот, а таксама іх выдаленне і здзяйсненне іншых дзеянняў, якія могуць прывесці да іх гібелі, скарачэння колькасці або парушэння асяроддзя іх вырастання, забараняюцца.

Артыкулам 15.8 часткай 2 Кодэкса Рэспублікі Беларусь аб адміністрацыйных правапарушэннях прадугледжаны штрафныя санкцыі за самавольны збор раслін, занесеных у Чырвоную кнігу, або карэнняў, кветак, пладоў такіх раслін у памеры ад 20 да 50 базавых велічынь.

У выпадку продажу дзікарослай цыбулі мядзведжай або іншых раслін — “чырванакніжнікаў” прадугледжана адміністрацыйная адказнасць у выглядзе накладання штрафу да 10 базавых велічынь у адпаведнасці з артыкулам 12.17 часткі 1 Кодэкса Рэспублікі Беларусь аб адміністрацыйных правапарушэннях (парушэнне правілаў гандлю).

Руслан ХІЛЬКО,

дзяржінспектар Ганцавіцкай міжраённай інспекцыі аховы жывёльнага і расліннага свету.