З АПЕРАТЫЎНЫХ ЗВОДАК ТЫДНЯ: крадзяжы веласіпедаў, ДТЗ і іншыя здарэнні

Сцеражыце веласіпеды!

24 лютага ў РАУС паступіла заява Наталлі Я., жыхаркі горада Ганцавічы, якая паведаміла, што ноччу невядомая асоба ўкрала з пад’езда дома № 49 па вуліцы Кастрычніцкай райцэнтра, веласіпед. А 1 сакавіка а другой гадзіне ночы паступіла заява Марыны Г. Жанчына расказала аператыўнікам, што ў перыяд з 28 лютага па 1 сакавіка нехта ўкраў яе дарожны веласіпед чырвонага колеру, які знаходзіўся ў пад’ездзе дома № 47 па той жа вуліцы.

Па гэтай жа прычыне 1 сакавіка па матэрыялах Ганцавіцкага РАУС былі ўзбуджаны дзве крымінальныя справы. У першым выпадку веласіпед, які належаў грамадзяніну К., укралі ў перыяд часу з 27 лютага па 1 сакавіка з падвала дома па вуліцы Мантажнікаў. А ў другім — транспартны сродак, коштам 1 мільён 800 тысяч рублёў, 1 сакавіка “знік” ад пад’езда дома № 44 па вуліцы Арлоўскага. Прычым, гаспадар веласіпеда, жыхар горада, М., пакінуў яго толькі на паўгадзіны без нагляду.

Хатні “тэрор”

23 лютага вечарам у аператыўны аддзел Ганцавіцкага РАУС паступіла паведамленне жыхара вёскі Сукач Эдуарда Р. Мужчына расказаў міліцыянерам, што дома яго б’юць пасынкі — Аляксей і Ілья.

Паведамленне грамадзянкі Марыі В. з вёскі Востраў таксама датычылася хатняга насілля. Так, 25 лютага жанчына расказала аператыўным супрацоўнікам, што яе сын Уладзімір пагражаў расправай ёй і мужу.

Крымінальныя навіны

25 лютага была ўзбуджана крымінальная справа ў адносінах Уладзіміра Б., які 20 студзеня з кватэры дома па вуліцы Матросава з папяровага канверта ў шафе ўкраў грошы ў суме 50 долараў.

26 лютага была ўзбуджана крымінальная справа ў адносінах Аляксандра М., 1981 года нараджэння, які больш за тры месяцы ўхіляўся ад выплаты аліментаў на ўтрыманне сваёй непаўналетняй дачкі. У выніку Аляксандр М. дапусціў запазычанасць па аліментах у суме 8 мільёнаў 545 тысяч 225 рублёў.

Калі сабака — не сябар

26 лютага жыхарка Ганцавіч Жанна Ж. расказала міліцыянерам аб тым, што бадзяжная жывёла загрызла ў яе 12 курэй. А на наступны дзень жанчына з вёскі Красынічы паведаміла ў РАУС аб зграі бадзяжных сабак, якія загрызлі яшчэ чатырох хатніх птушак.

Немужчынскія ўчынкі

28 лютага ў аператыўны аддзел міліцыі патэлефанавала Ірына Л., жыхарка горада Ганцавічы. Жанчына расказала, што яе муж Ігар забраў з дома 9-гадовае дзіця, і пайшоў выпіваць з сябрамі. На тэлефонныя званкі Ірыны нядбайны муж адказваў абразамі ў яе адрас, нават пагражаў.

СВЯТЛАФОР ДАІ

Раніцай 28 лютага супрацоўнікі ДАІ выехалі на месца аварыі. Невядомая асоба кіравала аўтамабілем “Форд-Фокус” і, рухаючыся па трасе Р-13 “Клецк — Сіняўка — Ганцавічы — Лунінец”, каля вёскі Малькавічы, не справілася з кіраваннем, у выніку чаго аўтамабіль з’ехаў у кювет і перавярнуўся.

Як высветлілася, “Фордам” кіраваў Андрэй З., 1988 года нараджэння, ураджэнец вёскі Люсіна. Дакументы на аўтамабіль у яго адсутнічалі. З месца ДТЗ парушальнік уцёк.

У дарожна-транспартным здарэнні пацярпеў пасажыр аўтамабіля, Сяргей І., жыхар вёскі Малькавічы, 1988 года нараджэння. Яго з траўмамі даставілі ў Ганцавіцкую ЦРБ.

Зводку чытала Ксенія ЛУЦКО.