З АПЕРАТЫЎНЫХ ЗВОДАК ТЫДНЯ: крадзяжы любога кшталту, незаконная зброя і іншыя здарэнні

17 лютага па матэрыялах Ганцавіцкага РАУС узбуджана крымінальная справа ў адносінах Н., жыхара вёскі Хатынічы, 1989 года нараджэння. Малады мужчына ноччу, знаходзячыся на вуліцы каля кафэ “Хвілінка” ў Хатынічах, на глебе асабістай непрыязнасці нанёс невядомую колькасць удараў рукамі і нагамі грамадзяніну В., чым прычыніў ахвяры цялесныя пашкоджанні ў выглядзе пералому пальца, вялікага кровападцёка твару, шматлікіх сінякоў і драпін.

Крадзяжы любога кшталту

У гэты ж аўторак у аператыўны аддзел міліцыі паступіла паведамленне ад жыхаркі вёскі Задуб’е Марыі Д. аб тым, што грамадзянін Уладзімір М. украў у яе грошы ў суме каля 2 мільёнаў рублёў.

Праверку па справе праводзіць РАУС.

У чацвер, 19 лютага, у аператыўны аддзел Ганцавіцкага РАУС паступіў званок ад Анатоля А., жыхара горада Ганцавічы. Мужчына паведаміў аб абуральным факце махлярства (крадзяжу грошай з рахунку) у адносінах непаўналетняга. А менавіта, невядомая асоба папрасіла ў сына мужчыны, Рамана, мабільны тэлефон, каб зрабіць адзін званок, але не сказала, што гэты званок будзе за мяжу. У выніку, запазычанасць на абаненцкім рахунку хлопчыка склала 780 тысяч рублёў.

Дэталі справы высвятляюцца ў РАУС.

Незаконная зброя

Крыху пазней супрацоўнік міліцыі паведаміў аператыўнікам, што ў вёсцы Задуб’е ім было выяўлена незарэгістраванае ружжо ТОЗ-БМ і 16 патронаў 18 калібру і 18 патронаў 32 калібру да яго.

Падрабязнасці справы зараз высвятляюцца.

Парушальнік ПДР

У чацвер, 19 лютага, ганцаўчанін Андрэй А. расказаў супрацоўнікам РАУС, што назіраў абуральны малюнак: каля магазіна “Журавушка” ў горадзе Ганцавічы на пешаходным пераходзе аўтамабіль “МАЗ” не прапусціў пешаходаў і ледзь не здзейсніў наезд на іх.

Складзены адміністрацыйны пратакол па ч. 6 арт. 18.14 Крымінальнага кодэкса аб адміністрацыйных правапарушэннях Рэспублікі Беларусь.

Інтэрнэт “не для ўсіх”

20 лютага па матэрыялах Ганцавіцкага РАУС была ўзбуджана крымінальная справа ў адносінах грамадзяніна Н., 1986 года нараджэння, жыхара вёскі Хатынічы, які 26 лютага 2011 года з выкарыстаннем сеткі інтэрнэт размясціў і рэкламаваў чатыры парнаграфічныя відэазапісы, выставіўшы іх на ўсеагульны агляд на сваёй старонцы ў сацыяльнай сетцы “ВКонтакте”.

Траўматычная паездка

У суботу, 21 лютага, у аддзел міліцыі паступіла паведамленне медсястры прыёмнага пакоя УАЗ “Ганцавіцкая ЦРБ”, якая паведаміла аб тым, што брыгадай хуткай дапамогі да іх дастаўлены непаўналетні Мікалай К., 2000 года нараджэння, жыхар горада Баранавічы, з траўмай у вобласці правай ключыцы і грудзіны. Па словах Мікалая, ён сыходзіў з цягніка і паслізнуўся, упаў на перон чыгуначнай станцыі “Ганцавічы”.

Зводку чытала

Ксенія ЛУЦКО.