У цесным узаемадзеянні

На базе Ганцавіцкага раёна прайшоў абласны семінар начальнікаў аддзелаў адукацыі, спорту і турызму па тэме “Кіраванне ўзаемадзеяннем устаноў адукацыі з бацькамі вучняў у сучасных сацыякультурных умовах”.

Адкрыццё семінара адбылося ў кінатэатры “Маладосць”. Першым слова ўзяў начальнік упраўлення адукацыі Брэсцкага аблвыканкама Міхаіл Ціханчук. Ён адзначыў, што тэма семінара вельмі актуальная, таму што без узаемадзеяння ўстаноў адукацыі і бацькоў нельга дасягнуць неабходнага эфекту ў выхаванні і адукацыі дзяцей. Закрануў Міхаіл Андрэевіч і асноўныя праблемы, якія трэба выключыць з маладзёжнага асяроддзя: суіцыды, гібель і траўматызм дзяцей у дарожна-транспартных здарэннях, а таксама ўжыванне школьнікамі наркатычных сродкаў.

Далей слова ўзяў намеснік старшыні Ганцавіцкага райвыканкама Сяргей Сарокаў. Ён пазнаёміў гасцей з сацыяльна-эканамічным развіццём Ганцаўшчыны, а таксама расказаў пра сістэму міжведамаснага ўзаемадзеяння ў рабоце з сям’ёй.

Начальнік аддзела адукацыі, спорту і турызму Ганцавіцкага райвыканкама Надзея Здрок выступіла з паведамленнем на тэму “Кіраванне ўзаемадзеяннем устаноў адукацыі з бацькамі вучняў у сучасных сацыякультурных умовах”, а начальнікі аддзелаў адукацыі, спорту і турызму Столінскага і Пінскага райвыканкамаў Аляксандр Вячорка і Ала Прылоўская расказалі пра сацыяльную палітыку і арганізацыйна-педагагічную дзейнасць органаў кіравання адукацыяй у адносінах да сям’і і дзяцей.

Удзельнікі семінара наведалі некалькі ўстаноў адукацыі раёна, дзе пазнаёміліся з рознымі формамі і метадамі работы па ўзаемадзеянні дзіцячых садкоў і школ з сем’ямі сваіх выхаванцаў і школьнікаў. Госці пазнаёміліся з адпаведнай работай у яслях-садзе № 7 г. Ганцавічы, гімназіі, СШ № 1, яслях-садзе № 11 в. Раздзялавічы, Раздзялавіцкай СШ, Хатыніцкай СШ і СШ № 3 г. Ганцавічы.

У СШ № 3 і былі падведзены вынікі семінара. Па словах начальніка ўпраўлення адукацыі аблвыканкама Міхаіла Ціханчука, начальнікаў аддзелаў адукацыі, спорту і турызму райвыканкамаў вобласці, на Ганцаўшчыне работа па ўзаемадзеянні ўстаноў адукацыі з бацькамі навучэнцаў пастаўлена на вельмі высокім узроўні. “Мы вельмі ўражаны ўбачаным, — адзначыў Міхаіл Андрэевіч. — У вас на самай справе ёсць чаму павучыцца”.

НА ЗДЫМКУ: фота на памяць.

Тэкст і фота

Уладзіміра САКАЛОВА.