Пажар на рынку і іншыя здарэнні мінулага тыдня

2 сакавіка ў 00.54 на цэнтр аператыўнага кіравання райаддзела па надзвычайных сітуацыях паступіла паведамленне аб загаранні на гарадскім рынку гандлёвага павільёна № 27.

У 00.56 два аддзяленні пажарнай аварыйна-выратавальнай часці № 1 г. Ганцавічы ўжо былі на месцы здарэння. Пажарныя ўстанавілі, што гарыць крайні суцэльнаметалічны павільён № 27 у гандлёвым радзе з дванаццаці ралетаў. Павільён электрыфікаваны, належыць індывідуальнаму прадпрымальніку Міхаілу З.

У 01.03 пажар быў лакалізаваны, у 01.06 — патушаны поўнасцю. У выніку пажару пашкоджаны тавар (мота- і велазапчасткі, бензаінструмент), закуродымлены сцены.

Зараз устанаўліваецца прычына, па якой загарэўся гандлёвы павільён.

Аляксандр ПАРФЕЯВЕЦ, інспектар РАНС.

Жыхары раёна знаходзяць паляўнічыя стрэльбы

У мінулы панядзелак у РАУС паступіла заява грамадзяніна Антона М., жыхара райцэнтра, аб прыняцці для ўтылізацыі паляўнічай стрэльбы 16-га калібра, якую ён знайшоў 23 лютага на палігоне бытавых адходаў у вёсцы Любашава.

У гэты ж дзень у міліцыю звярнуўся жыхар вёскі Малькавічы Уладзімір Л., які таксама хацеў здаць для ўтылізацыі паляўнічую стрэльбу 12-га калібра. У суботу, 22 лютага, Уладзімір Л. знайшоў яе, калі разбіраў драўляны хлеў.

У аўторак, 24 лютага, у РАУС паступіла яшчэ адна заява — ад жыхара вёскі Шашкі Яўгена Ч. Ён прасіў прыняць меры па ўтылізацыі патронаў 12-га калібра, якія знайшоў на міні-палігоне недалёка ад Шашкоў.

Па ўсіх гэтых справах РАУС праводзіць праверку.

Затрыманы хлопец са спайсам

У апошні час адбываюцца выпадкі гібелі маладых людзей. Не так даўно ў нашай краіне загінуў хлопец, які хацеў выскачыць з акна. Ад раненняў, атрыманых ад разбітага шкла, ён памёр. Яшчэ адзін выпадак — загінула 18-гадовая дзяўчына, студэнтка прэстыжнага факультэта БДУ. Прычыны абедзвюх смярцей — ужыванне маладымі людзьмі спайсу.

Гэты наркотык зараз “гуляе” і па нашым раёне. Літаральна на мінулым тыдні супрацоўнікі міліцыі на вуліцы Заводскай затрымалі грамадзяніна са спайсам. Што хлопец хацеў з ім рабіць: ужыць самастойна ці прадаць — гэта прыйдзецца высветліць міліцыянерам.

Забрала картку і п’янствуе

На мінулым тыдні, у панядзелак, у РАУС паступіла паведамленне ад жыхара вёскі Малькавічы Мікалая Х. Мужчына скардзіўся на тое, што жонка забрала ў яго банкаўскую картку і недзе п’янствуе. Праверку праводзіць РАУС.

Начны званок патрывожыў усю сям’ю

З цікавай заявай да супрацоўнікаў РАУС звярнулася жыхарка Малькавіч Алена Л. Жанчына прасіла міліцыянераў прыняць меры адміністрацыйнага ўздзеяння да нейкай жанчыны, якая ў начны час патэлефанавала на мабільны тэлефон і тым самым патрывожыла яе сям’ю. Праверку праводзіць РАУС.

Загінуў работнік райаграсэрвісу

У мінулы аўторак, днём, у міліцыю паступіла паведамленне медыцынскай сястры прыёмнага пакоя раённай бальніцы аб тым, што ў рэанімацыйнае аддзяленне дастаўлены Міхаіл Х. з дыягназам “чэрапна-мазгавая траўма”, якую ён атрымаў на рабочым месцы ў цэху Ганцавіцкага райаграсэрвісу. Не прыходзячы ў прытомнасць, мужчына памёр. Праверку праводзіць РАСК.

СВЯТЛАФОР ДАІ

За кіраванне транспартным сродкам у стане алкагольнага ап’янення затрыманы нідзе не працуючы жыхар в. Дзяніскавічы Мікалай Іванавіч Сукач, 1983 года нараджэння, які кіраваў аўтамашынай “ВАЗ-2112”.

Зводку чытала

Аксана МІНІНА.