У кожнага дзіцяці павінна быць сям’я

Каля 30 тысяч дзяцей-сірот і дзяцей, пакінутых без апекі бацькоў, налічваецца ў нашай краіне. Клопат аб іх бярэ на сябе дзяржава, але ніводзін дом-інтэрнат не заменіць бацькоўскай цеплыні і ласкі. Толькі сям’я можа падарыць ім шчаслівае дзяцінства. І менавіта апякунскія і прыёмныя сем’і закліканы стаць альтэрнатывай дамам-інтэрнатам.

На Брэстчыне пабудаваны ўжо 32 дамы сямейнага тыпу, дзе выхоўваюцца сотні дзяцей. Афіцыйнае адкрыццё аднаго з іх — першага на Ганцаўшчыне — адбылося 26 лютага ў аграгарадку Агарэвічы. Двухпавярховы катэдж пабудаваны за кошт сродкаў ААТ “ААБ “Беларусбанк”, на які затрачана звыш 4 мільярдаў рублёў. У яго добраўпарадкаванні значны ўдзел прынялі прадпрыемствы, арганізацыі і прадпрымальнікі раёна.

Ва ўрачыстай абстаноўцы шматдзетнай сям’і Ерназаравых, якая стала прыёмнай для 5 дзетак, уручылі сімвалічны ключ ад дома, а губернатар вобласці Канстанцін Сумар, старшыня праўлення ААТ “ААБ “Беларусбанк” Сяргей Пісарык і кіраўнік раёна Аляксандр Саланевіч паднеслі ў якасці каштоўных падарункаў розную бытавую тэхніку.

Канстанцін Андрэевіч асабліва адзначыў важнасць падзеі, бо яшчэ пяцёра дзетак знайшлі сваю сям’ю, а адкрыццё чарговага дома сямейнага тыпу стала працягам мэтанакіраванай палітыкі нашай дзяржавы. У сваю чаргу, Сяргей Пісарык засяродзіў увагу на сацыяльнай адказнасці бізнэсу і той рабоце, што праводзіць “Беларусбанк” у гэтым плане. За кошт сродкаў банка ў краіне ўжо ўзведзена 14 дамоў сямейнага тыпу, дзе выхоўваецца 120 дзяцей, і будуць будавацца яшчэ. Больш таго, “Беларусбанк” і далей працягвае ўзаемадзейнічаць з такімі сем’ямі і аказваць ім дапамогу. Словы ўдзячнасці за дапамогу ў стварэнні дома сямейнага тыпу выказаў Аляксандр Саланевіч. Ён таксама адзначыў актыўную пазіцыю ганцаўчан, якія адгукнуліся і зрабілі свой важкі ўклад у высакародную справу.

Безумоўна, усе выступаючыя выказалі словы павагі бацькам-выхавальнікам, якія прынялі ў сваю сям’ю дзяцей, сталі для іх роднымі і блізкімі людзьмі.

Дарэчы, у сям’і Ерназаравых нарадзілася шасцёра дзяцей, з якіх трое ўжо дарослыя. І цяпер там выхоўваецца 8 гарэз — Крысціна, Андрэй, Ягор, Валерыя, Дар’я, Батыржан, Ержан і Каміла. Хто з іх прыёмны — не разбярэш, а бацькі не робяць падзелу. Для іх яны ўсе любімыя, усе родныя.

Сімвалічна тое, што бацькі — Надзея і Абдзігапар Ерназаравы — самі выхоўваліся ў шматдзетных сем’ях. Цікавая і іх сямейная гісторыя. Надзея Мікалаеўна сама родам з Хатыніч. Лёс звёў яе з будучым мужам, калі той праходзіў тэрміновую службу ў вайсковай часці, што знаходзіцца непадалёк ад райцэнтра. У 1988 годзе яны пажаніліся і выехалі ў Казахстан, на радзіму мужа. Але праз 15 гадоў вярнуліся назад. Зараз Абдзігапар Ерназараў працуе будаўніком, а Надзея Мікалаеўна займаецца дзецьмі. Зразумела, клопатаў хапае, але яны — радасныя, бо дзеці дораць ім сваю бязмежную любоў.

Пасля агляду дома, калі шаноўныя госці пабачылі, як абуладкавалася сям’я на новым месцы, за кубкам гарбаты дзеці дзяліліся сваімі ўражаннямі, а таксама поспехамі ў вучобе. І Сяргей Пісарык паабяцаў за сістэматычныя добрыя адзнакі па вучэбных прадметах падтрымаць кожнага персанальным камп’ютарам.

Ужо ў размове з журналістамі кіраўнік вобласці Канстанцін Сумар заўважыў, што стаіць задача ў краіне адысці ад дамоў-інтэрнатаў. Дарэчы, толькі летась пяць з іх ужо закрыліся ў вобласці, бо аказаліся незапатрабаванымі. І пераарыентацыя на выхаванне дзяцей-сірот і дзяцей, пакінутых без апекі біялагічных бацькоў, будзе працягвацца менавіта ў апякунскіх і прыёмных сем’ях. Але, безумоўна, застануцца дамы-інтэрнаты для дзетак, якім у сілу псіхафізічнага развіцця неабходны пастаянны медыцынскі агляд спецыялістаў. Аляксандр Саланевіч выказаў упэўненасць, што ў раёне такі дом сямейнага тыпу не апошні і дзеткі знойдуць свае сем’і.

Варта адзначыць, што падчас наведвання Ганцаўшчыны з такой важнай нагоды губернатар вобласці не прамінуў пацікавіцца вытворчымі справамі — наведаў аб’екты СВК “Будча” і “Агарэвічы”. Па апошняй сельгасарганізацыі ў яго адбылася размова з Сяргеем Пісарыкам наконт дапамогі ў развіцці вытворчасці гаспадаркі. Таксама пагутарыць з кіраўніком вобласці і задаць хвалюючыя пытанні мелі магчымасць жыхары аграгарадка, а сённяшнія школьнікі старэйшых класаў Агарэвіцкай СШ расказалі аб сваіх планах на будучыню.

Павел СВІСТУНОВІЧ.

Фота аўтара.