Майстар-клас — ад Ігара Квашэвіча

Калі ў дзіцячай школе мастацтваў даведаліся, што ў нашым горадзе будзе выступаць са сваёй праграмай вядомы акардэаніст, лаўрэат Вышэйшай лігі мэтраў сусветнага акардэона Ігар Квашэвіч, вырашылі звярнуцца да яго з просьбай даць іх вучням майстар-клас. Ігар адгукнуўся на прапанову і ў дзень  наведвання нашага райцэнтра завітаў у гэтую ўстанову.

Адкрыты, добразычлівы, ён адразу растапіў сэрцы рабят сваёй цёплай, прыязнай усмешкай,  схіліў да сябе сваёй шчырасцю. Ці не таму вучань другога класа па класе баяна Міша Лебедзь і выпускніца школы мастацтваў Дар’я Жыбурт (клас Веранікі Бобка) смела, нібыта даўно знаёмы з гэтым прызнаным майстрам, вынеслі на яго суд свае навыкі ігры? А Ігар Квашэвіч, ацаніўшы здольнасці рабят, тактоўна і неназойліва даваў ім свае каштоўныя парады. Гэта былі імгненні працы Настаўніка і тых, хто палюбіў Яе Вялікасць Музыку. Гэта была сустрэча, якая запомніцца не толькі Міхаілу і Дар’і, але і ўсяму калектыву педагогаў і вучняў дзіцячай школы мастацтваў. Бо славуты акардыяніст даў ім цудоўны канцэрт, які таксама можна лічыць найвышэйшым майстар-класам ад мэтра — сыграў  на сваім акардэоне класічныя творы, расказаў прысутным пра свой любімы інструмент.

Час знаёмства з Ігарам Квашэвічам у дзіцячай школе мастацтваў праляцеў як адно імгненне. Але сустрэча з ім працягнулася ў гарадскім Доме культуры, дзе праходзіў яго канцэрт ужо эстраднай музыкі з шоу-балетам і куды Ігар запрасіў выхаванцаў школы мастацтваў.

Наш кар.

НА ЗДЫМКУ: Ігар Квашэвіч з кіраўніком народнага аддзялення дзіцячай школы мастацтваў Вольгай Купрыянік і вучнем другога класа гэтай установы Міхаілам Лебедзем.

Фота з архіва народнага аддзялення ДШМ.