Дырэктар школы падазраецца ў тым, што забірала ў настаўнікаў частку прэміяльных

Дырэктар сталічнай школы падазраецца ў тым, што на працягу трох гадоў выпісвала настаўнікам прэміі, забіраючы ў іх частку грошай. Ананімныя крыніцы кажуць, што такая ж практыка існуе і ў школах нашага рэгіёну.

Супраць дырэктара адной з мінскіх школаў была ўзбуджана крымінальная справа. Дырэктару інкрымінуецца здзяйсненне злачынства па арт.210 Крымінальнага кодэкса Беларусі (крадзеж шляхам злоўжывання службовымі паўнамоцтвамі), паведамляе «Штодзённік».

Паводле дадзеных аператыўных службаў, 54-гадовая дырэктар школы са снежня 2008 году па ліпень 2012 году арганізавала налічэнне прэмій працаўнікам адукацыйнай установы. Па дадзеных праваахоўных ворганаў, дырэктар частку прэміяльных прымушала працаўнікоў школы ахвяраваць. Паводле падлікаў МУС, за тры гады дырэктар такім чынам выкрала больш 10 мільёнаў рублёў.

Аднак у самай школе ацэнка дзеянняў дырэктара неадназначная. Па словах абаронцаў падазраванай, настаўнікі дзяліліся прэміяльнымі па дамоўленасці з дырэктарам, бо школе патрэбныя былі наяўныя сродкі на пакрыццё выдаткаў, якія проста не прапісаныя ў бюджэце школы і, значыць, афіцыйна іх правесці нельга было. Кажуць, што такая практыка існуе ў многіх школах, але пра яе ўсе маўчаць, у тым ліку і супрацоўнікі аддзелаў адукацыі выканкамаў, якія вельмі нават у курсе справы, піша Хартыя 97.

Карэспандэнт "Westki.info" паспрабаваў высветліць, ці маюць месца такія выпадкі ў нашым рэгіёне:

Дырэктары не забіраюць грошы сабе. Яны іх укладваюць у розныя патрэбы: замаўляюць новыя стэнды, набываюць насенне кветак, канцылярскія рэчы і г.д.. Разлік ідзе гатоўкай. У любым выпадку, адбываецца "адмыванне" грашовых сродкаў ў выніку беднасці навучальных устаноў і завышаных патрабаванняў да іх з боку аддзелаў адукацыі.

Гэта махлярскі, але ледзь не адзіны спосаб вырашыць бягучыя пытанні жыццядзейнасці ўстановы адукацыі, кажуць настаўнікі.