Опскі палац перабудуюць на гатэль

Стогадовы палац Плятараў у мястэчку Опса (Браслаўскі раён) будзе перабудаваны на гатэль.

Надзея Шаткоўская, супрацоўніца аддзела эканомікі Браслаўскага райвыканкама, паведаміла парталу Kraj.by, што ўжо аформлены акт набыцця-продажу будынка.

Новым уласнікам Опскага палаца стала буйная рыэлтэрская кампанія. “Пакадан” (Мінск). Гаспадары пачалі ўжо наводзіць парадак на тэрыторыі - забілі дошкамі аконныя праёмы, на браме прыбілі шыльду, што гэта прыватная ўласнасць, нанялі вартаўнікоў, каб пільнаваць будынак.

Павел Кузняцоў, генеральны дырэктар "Пакадана", паведаміў, што ў палацы будзе зроблены гатэль на 52 месцы.

Новыя гаспадары пачалі наводзіць парадак каля палаца. Фота Галляша Сялявы, Kraj.by

Дагэтуль палац належаў Беларускаму таварыству інвалідаў, якое мелася адчыніць тут пансіянат, але не знайшло грошай на рамонт.

Опса ўпершыню згадваецца ў 1500 годзе і была цэнтрам каралеўскай воласці. У ХІХ стагоддзі Опскі двор стаў уласнасцю Плятараў. Па праекце панявежскага дойліда Целяжынскага ў 1904 годзе быў змураваны новы палац.

Палац у Опсе. Фота 60 гадоў ХХ стагоддзя, Radzima.org

Плятары, аднак, не жылі ў Опсе – іх рэзідэнцыяй быў двор Бяльмонты каля вёскі Ахрэмаўцы (Браслаўскі раён). У 1922 годзе яны прадалі палац дзяржаве – і там адчынілася сельскагаспадарчая школа, што дзейнічала да пачатку савецкай акупацыі. Пасля вайны тут была школа-інтэрнат, а потым палац стаяў пусты.

Студэнты сельскагаспадарчай школы ў Опсе. 30-я гады ХХ стагоддзя. Radzima.org

У 2010 годзе дзяржава прадала таварыству “Глория 777” палац Бішэўскіх у мястэчку Лынтупы (Пастаўскі раён). Цяпер там ідзе рэканструкцыя – новы ўласнік плануе ўкласці каля 7 мільёнаў даляраў, каб зрабіць з палаца гатэльна-забаўляльны комплекс.

На продаж таксама выстаўленыя палацы ў Азярцах (Глыбоцкі раён), Відзах Лаўчынскіх (Браслаўскі раён), Бігосаве (Верхнядзвінскі раён).