У Дрыбіне адзначылі Дзень роднай мовы

Учора 21 лютага, калі ва ўсім свеце адзначаўся Міжнародны дзень роднай мовы, у Дрыбіне адбылася сімвалічная беларускамоўная дыктоўка. Аднак прайшла яна не ў школе і пісалі яе не дзеці, а дарослыя людзі.

Каб выказаць павагу да роднай мове, мясцовыя жыхары дамовіліся сабрацца разам у адной з мясцовых кавярняў і напісаць тут пад дыктоўку беларускамоўны тэкст. На імпрэзу прыйшлі 13 чалавек. Яны выбралі прамову Янкі Купалы, сёлета ў нашага знакамітага песняра – юбілей, 130 гадоў з дня нараджэння. Добра пастаўленым голасам дыктоўку дрыбінцам прачытала былая настаўніца беларускай мовы.

Як расказала ініцыятарка гэтай культурнай імпрэзы Тамара Юневіч, сабраць людзей было вельмі проста. Усе, каму актыўная жанчына прапанавала прыйсці на дыктоўку, пагадзіліся.
Зусім іншае стаўленне было ў мясцовай “вертыкалі”, да якой Тамара Юневіч звярнулася па дапамогу ў арганізацыі дыктоўкі.
Першы чыноўнік сказаў, што беларуская дыктоўка – гэта прапаганда адной з дзяржаўных моў, а такога быць не павінна. Другі – што ніхто з настаўнікаў не пагодзіцца ўдзельнічаць у дыктоўцы, бо пабаяцца паказаць свае веды. Трэці вырашыў чамусьці, што нехта пры дапамозе дыктоўкі хоча наладзіць кантроль за выкладаннем беларускай мовы у Дрыбіне...
Тым часам у абласным Палацы культуры ў Магілёве дыктоўка адбылася яшчэ ў нядзелю.
На яе прыйшлі каля 60 чалавек. Па словах Алега Дзьячкова, актывіста Таварыства беларускай мовы з Магілёва: “Дыктоўка яднае людзей рознага веку, поглядаў, сацыяльнага статусу. У ёй прымаюць удзел усе, каму неабыякавы лёс нацыянальная культуры”. Агульнанацыянальная дыктоўка праводзіцца ў Беларусі пяты год запар. Яна з’яўляецца сімвалічным напамінам пра родную мову для беларусаў па ўсім свеце.
Міжнародны дзень роднай мовы адзначаецца з 2000 года па рашэнні ЮНЕСКА.
Генеральная Асамблея ААН падтрымала гэта рашэнне і заклікала дзяржавы – члены ААН садзейнічаць абароне ўсіх моў. Святкаванне гэтага дня падкрэслівае значнасць захавання культурнага багацця нашай планеты.
Ягор Клішэвіч