Акцыю ў Слуцку разагналі трактарам. ...

1 кастрычніка ў Слуцку павінен быў адбыцца суботнік, прысвечаны добраўпарадкаванню могілак на вуліцы Чатырнаццаці Партызан. Грамадзянская кампанія «Наш Дом» з мінулага лета праводзіць акцыю «Кветкі замест чартапалоха», мэта якой — дамагчыся цывілізаваных умоў на могілках.
Грамадзянская кампанія звярнулася ў гарвыканкам па дапамогу ў правядзенні акцыі, а таксама запрасіла на суботнік на могілкі дэпутатаў Слуцкага гарсавета. Камунальнікі паабяцалі выдзеліць інвентар, а таксама звярнуліся да жыхароў горада з просьбай падтрымаць акцыю і прыйсці на суботнік. Кожнаму дэпутату грамадзянскія актывісты падрыхтавалі «імянную рыдлёўку» з адпаведнымі таблічкамі.
«Першымі на месца збору падаспелі два міліцыянеры і супрацоўнік КДБ, які скамандаваў адарваць таблічкі. Не назваўшыся, не кажучы ні слова, два супрацоўнікі праваахоўных органаў сарвалі з рыдлёвак таблічкі з імёнамі дэпутатаў, — паведамляецца ў прэс-рэлізе. — У гэты час камунальнікі падвезлі інвентар — 14 грабляў і падагналі трактар з прычэпам, у які, як меркавалі актывісты, будуць складваць сабранае на могілках смецце. Аднак трактар спецыяльна наехаў на шэраг падрыхтаваных для дэпутатаў рыдлёвак. Удзельнікі суботніка стаялі побач, і рыдлёўкі, падаючы, ударылі некалькі чалавек. Пацярпела карэспандэнтка „Белсата“, якую ледзь не зацягнула пад колы — яе павезлі ў бальніцу».
Актывісты кампаніі выклікалі на месца ДТЗ супрацоўнікаў ДАІ. Паведамляецца таксама, што міліцыянеры спрабавалі затрымаць двух праваабаронцаў «Нашага дома» — Крысціну Шацікаву і Валерыя Шчукіна, якія прыехалі паўдзельнічаць у суботніку.
Лідар кампаніі «Наш дом» Вольга Карач абурана паводзінамі ўладаў: «Гэта блюзнерства. У нашай беларускай культуры могілкі — гэта месца, дзе звычайна смуткуюць па памерлых. А не месца, дзе трактарамі душаць людзей. Людзі прыйшлі прыбраць могілкі і спадзяваліся, што „народныя абраннікі“ падтрымаюць ініцыятыву. Добра што ўсе дэпутаты загадзя атрымалі лісты з запрашэннямі. А замест гэтага — трактары і міліцыя. Пацярпелі людзі. Няўжо хоць раз у жыцці наша ўлада не можа нічога зрабіць па-людску, хаця б з павагі да памерлых?»
 
БелаПАН