Цягнічок прыехаў у Маладзечна і пакатае нас у святы

26 снежня, у Маладзечна прыехаў "Цягнічок", зроблены на віцебскім прадпрыемстве “Віцбудтэхмаш”. На атракцыёне можна будзе пакатацца 28-31 снежня, 1 і 7 студзеня. На спецыяльнай фуры цягнічок з двума вагончыкамі прыбыў з Віцебска. Праехаў па горадзе, зрабіў круг па Цэнтральнай плошчы і вуліцы Прытыцкага. Яго імя Віпоша – ад "віцебскія пад'ёмнікі". Але можна лічыць, што цягнічок прызначаны для катання VIP-персон (вельмі важных персон). Па словах начальніка аддзела культуры Маладзечанскага райвыканкама Аляксандра Рамановіча, такі атракцыён, разлічаны на 28 дзяцей, будзе працаваць у горадзе 28 снежня-1 студзеня і 7 студзеня. Пасажыры будуць сядаць у вагоны на станцыі "Папараць-кветка", ля аднайменнай скульптуры. Затым – да ёлкі на плошчы, круг вакол яе, па пешаходнай частцы вуліцы Прытыцкага, да гарадскога гадзінніка, пасля чаго вяртаецца да ёлкі, дзе дзяцей сустрэне Дзед Мароз і Снягурачка.

Па словах Аляксандра Рамановіча, цяпер складаецца калькуляцыя кошту білета. Паводле папярэдніх падлікаў, ён будзе каштаваць 10-15 тысяч рублёў. Улетку "Цягнічок" будзе курсіраваць па парку. Начальнік вытворчасці “Віцбудтэхмаш” Канстанцін Грубенка расказаў у інтэрв'ю "РГ", што "Цягнічок" для Маладзечна рабілі ў паскораным тэмпе, па 12 гадзін у дзень без выхадных, каб паспець да Новага года. Справіліся за два з паловай тыдні. Атракцыён зроблены на базе трактара "Беларусь-132Н". Такія самыя, але з плугамі, культыватарамі, замест вагонаў, працуюць на зямельных участках. Максімальна магчымая хуткасць – 18 км/г. Магутнасць рухавіка – 8,7 л/с. Працуе на бензіне. "Ход вагонаў вельмі мяккі: восі аснашчаныя тарсіённай падвескай (на пругких стрыжнях). У плане бяспекі – 100-працэнтная гарантыя: вагоны абсталяваныя такім відам тармазной сістэмы, што самі спыняцца, калі якім-небудзь чынам адчэпяцца", – патлумачыў Канстанцін Грубенка. На ўвесь цягнічок прадпрыемства дае два гады гарантыі. Графік работы атракцыёна "РГ" апублікуе крыху пазней. Святлана ЦІШКО. Фота Святланы ЦІШКО.