На Дзень iнфармавання завiтаў вiцэ-прэм’ер

У актавай зале Запольскай  школы  Валерый Іваноў выступіў перад насельніцтвам Смілавіцкага сельсавета.  Па пазначанай тэме дня інфармавання ён, у прыватнасці,   адзначыў, што аварыя на Чарнобыльскай АЭС лічыцца  буйнейшай тэхнагеннай катастрофай 20 стагоддзя.  Яна нанесла вялікую шкоду эканоміцы краіны. «Амаль 38 дзяржбюджэтаў краіны ўзроўню 1985 года – вынік страт нашага народа ў выніку аварыі, — сказаў ен. — Праблемы пераадолення яе наступстваў  будуць праследаваць беларускае насельніцтва яшчэ доўгія гады і аказваць негатыўнае ўздзеянне на здароўе людзей.  Але нягледзячы на вялікія  выпрабаванні, беларускі народ змог справіцца, выстаяць, краіна дынамічна развіваецца. У Беларусі  выканана  вялікая работа па рэабілітацыі забруджаных раёнаў, аздараўленню пацярпеўшага насельніцтва, ажыццяўленню прыродаахоўных мерапрыемстваў. Цяпер наша краіна  перайшла да новага этапу рашэння чарнобыльскіх праблем – ад рэабілітацыі забруджаных тэрыторый да іх актыўнага адраджэння і развіцця. Як адзначыў  віцэ-прэм’ер, у  пацярпеўшых раёнах ужо магчыма  развіццё сельскагаспадарчай вытворчасці, стварэнне рабочых месц.  Там можна весці нармальную эканоміку, жыццё з абавязковым  захаваннем усіх неабходных мер радыяцыйнай абароны насельніцтва. Рэалізацыя палітыкі адраджэння забруджаных тэрыторый ажыццяўляецца ў рамках новай Дзяржаўнай праграмы па пераадоленню наступстваў катастрофы на АЭС на 2011-2015 гады.

Затым  віцэ-прэм»ер  спыніўся на задачах, што стаяць перад краінай падчас правядзення цяперашняй пасяўной кампаніі, неабходнасцю атрымаць  рэспублікай 9 мільёнаў тон зерня.  Ён зазначыў, што  з боку дзяржавы зроблена ўсё магчымае, каб гэтая  мэта  была ажыццёўлена. У прыватнасці, аказана дапамога гаспадаркам па набыццю высокаэфектыўнай тэхнікі, элітнага і першай рэпрадукцыі насення, комплексаў па  дапрацоўцы зерня, паліва. Цяпер справа за высокай арганізацыяй работы, захаваннем  тэхналагічных і агратэхнічных  норм, сумленнымі адносінамі  да сваёй справы тых, ад каго залежыць будучы ураджай.  І  Чэрвеньскі раён не выключэнне, заўважыў віцэ-прэм’ер. Бо  ў мінулым годзе быў атрыманы не той вынік, які можна мець  у раёне. А перспектывы для гэтага есць.

– У гэтым я ўпэўніўся,– адзначыў Валерый Іваноў,– пазнаёміўшыся  з некаторымі гаспадаркамі, тым, як праходзіць пасяўная,  пераменамі , якія  адбыліся пасля замены  кіраўнікоў некаторых сельгасарганізацый у раёне, у тым ліку  калектыву ААТ «Запольскае».

Падчас сустрэчы  Валерый Іваноў  адказаў на некаторыя пытанні прысутных. У прыватнасці,  людзі прасілі пасадзейнічаць хутчэй пабудаваць маладзёжны клуб у в. Заполле,  дзіцячую гульневую пляцоўку. Востра ставілі  пытанне добраўпарадкавання 30 метраў дарогі, якую пашкодзілі падчас будаўніцтва аграгарадка і да гэтага часу не збіраюцца  рамантаваць. Віцэ-прэм’ер загадаў  да 9 мая выправіць  становішча. Старшыня райвыканкама Іван Муха, які  разам з прадстаўнікамі некаторых служб раёна таксама  прымаў удзел на дні  інфармавання, паабяцаў  выправіць становішча за кошт таго, хто нанёс гэтую шкоду весцы.

Таксама  былі абмеркаваны  пытанні, звязаныя непасрэдна  з павышэннем цэн і розніцай  кошту на некаторыя  прадукты харчавання, сітуацыя, якая складваецца на валютным рынку краіны. Віцэ-прэм’ер  адказаў на ўсе пытанні  прысутных  і праінфармаваў аб мерах, якія прымае  цяпер урад па стабілізацыі сітуацыі ў рэспубліцы.

Людміла РАБЕЦКАЯ