Зоркі НБА завіталі ў Чэрвень да хворых дзяцей

Днямі Беларусь наведала дэлегацыя са Злучаных Штатаў Амерыкі на чале са старшынёй фонду “Духоўная Дыпламатыя” Майклам Маргулісам і заснавальнікам кампаніі “Sportsрower International” Білам Алексанам. У яе склад, у прыватнасці, увайшлі сусветна вядомыя ветэраны Нацыянальнай баскетбольнай асацыяцыі Джэром Уільямс (“Таронта”, “Дэтройт”, “Чыкага” і “Нью-Ёрк”), Дэвід Вуд (былы форвард “Голдэн Стэйт”, “Сан-Антоніа” і “Дэтройта”), Пол Грант (экс-цэнтравы “Мінесоты” і “Юты”), яе дзеючыя ігракі.

Праграма візіту, галоўная мэта якога – папулярызацыя баскетбола і развіццё беларуска-амерыканскіх адносін праз спорт і рэалізацыю сацыяльных праектаў, уключала ў сябе майстар-класы, наведванне спартыўных і культурна-гістарычных аб’ектаў, два таварыскія матчы каманды зорак НБА з мацнейшымі баскетбалістамі чэмпіянату Беларусі ў Мінску і Магілёве. Таксама дэлегацыя з ЗША завітала ў Чэрвеньскі дом-інтрэнат для дзяцей-інвалідаў і маладых інвалідаў з асаблівасцямі псіхафізічнага развіцця.

– Я ўжо прыязджаў сюды з прадстаўнікамі нашага фонду сем гадоў таму, – распавёў у гутарцы з карэспандэнтам “Раённага весніка” Майкл Маргуліс. – Тая сустрэча ўсіх нас вельмі ўразіла. І я паабяцаў сабе, што калі-небудзь мы абавязкова вернемся ў ваш дом-інтэрнат зноў. Бо нельга быць абыякавымі да вельмі складаных лёсаў гэтых дзяцей. І калі мы, хрысціяне, кажам словы пра любоў і дабрыню, то яны не павінны заставацца проста словамі. Таму я вельмі спадзяюся, што гэтая сустрэча прынясе рэальны плён у выглядзе дапамогі дому-інтэрнату, якую маюць намер аказаць некалькі амерыканскіх дабрачынных арганізацый…

Работнікі і выхаванцы інтэрната паказалі замежным гасцям фрагменты канцэртных праграм, падрыхтаваных да 70-годдзя Вялікай Перамогі. Яны выступалі так шчыра і пранікнёна, што сябры дэлегацыі ўсё зразумелі без перакладу. У многіх на вачах з”явіліся слёзы…

Сапраўднае свята падарыў хворым дзецям сусветны рэкардсмен па працягласці жангліравання баскетбольным мячом (22 гадзіны і 12 хвілін) і ўладальнік рэкорду Гінеса па жангліраванню найбольшай колькасцю мячоў адначасова Брус Крэвер, які разам з дачкой прыехаў у складзе амерыканскай дэлегацыі ў нашу краіну. Ён не толькі паказаў сваё фантастычнае майстэрства, але і правёў гульні з выхаванцамі інтэрната, падчас якіх чароўным чынам “прымушаў” мячы круціцца ў іх руках.

Ігар АДАМОВІЧ. Фота аўтара