Атрымалі тлумачэнні і пагутарылі за жыццё

Чарговы прыём грамадзян прадстаўнікамі абласной улады ў нашым раёне адбыўся на мінулым тыдні. На гэты раз жыхары мелі магчымасць звярнуцца да намесніка старшыні Мінскага аблвыканкама Анатоля Мірчука.
На сустрэчу з ім папярэдне запісаліся чатыры чалавекі. Іх пытанні тычыліся, у асноўным, жыллёвых праблем. Жыхарка Чэрвеня выказала сумненне ў правільнасці налічанай ёй раённай ЖКГ вялікай сумы грошай за прыватызацыю старой кватэры, за якую можна купіць новую. Таму яна прасіла пасадзейнічаць, каб дакладны пераразлік зрабіла ёй абласная жыллёва-камунальная гаспадарка. Анатоль Васільевіч паабяцаў, што на працягу 10 дзён яе просьба будзе выканана.
Шматдзетная маці, пенсіянерка з в. Ведрыца, прасіла дапамагчы ёй прыватызаваць дом, які знаходзіцца ва ўласнасці ранейшага СПК «Новая Ніва», а цяпер ААТ «Ганута-Агра». Справа гэтая цягнецца ажно з 1995 года і да цяперашняга часу ніяк не завершыцца. Патэлефанаваўшы дырэктару гаспадаркі, намеснік старшыні аблвыканкама заверыў жанчыну, што яе пытанне без прамаруджвання вырашыцца на працягу некалькіх дзён.
Прадпрымальнік з Чэрвеня прасіў дапамагчы набыць за палову кошту пустуючы будынак ПМК-237, каб абсталяваць яго пад швейны цэх, прыцягнуць новыя рабочыя месцы, а ў будучым — аказваць паслугі насельніцтву. Анатоля Васільевіча зацікавіла такая перспектыва. Ён паабяцаў пасадзейнічаць у вырашэнні гэтай праблемы.
А былы настаўнік з Чэрвеня прыйшоў да прадстаўніка абласной ўлады, каб пацікавіцца, ці будзе працягвацца праграма па льготнаму будаўніцтву жылля, бо гэтае пытанне непасрэдна тычыцца яго дачкі. Яна больш за 10 гадоў жыве з сям»ёй у інтэрнаце г. Мінска і стаіць на чарзе на атрыманне жылля. Акрамя таго, пенсіянер пагутарыў з Анатолем Васільевічам за жыццё, з хваляваннем – пра здароўе сучаснай моладзі, яе будучыню.
***
У гэты ж дзень для жыхароў раёна адначасова «прамую лінію» і прыём грамадзян праводзіў начальнік Мінскага абласнога упраўлення Дэпартамента дзяржаўнай інспекцыі працы і сацыяльнай абароны Рэспублікі Беларусь Сяргей Шкруднеў. На яго тэлефон паступіла два звароты, якія тычыліся пытанняў гандлю і работы аўтапарка №20.

Л.Цітаўка