23 сакавіка – выбары ў мясцовыя Саветы дэпутатаў

Рашэннем раённага выканаўчага камітэта на Чэрвеньшчыне ўтвораны 30 участкаў для галасавання па выбарах дэпутатаў мясцовых Саветаў дэпутатаў Рэспублікі Беларусь 27 склікання. Пра гэта паведаміла «Раённаму весніку» загадчык аддзела арганізацыйна-кадравай работы райвыканкама Наталля Дмухоўская.

Яна праінфармавала, што агульная колькасць выбаршчыкаў раёна, якія маюць права прыняць удзел у галасаванні, паводле статыстыкі мінулай выбарчай кампаніі, складае 25 тысяч 389 чалавек. Падчас выбараў, якія адбудуцца 23 сакавіка 2014 года, неабходна абраць 31 дэпутата ў раённы Савет дэпутатаў, 11 – у Смілавіцкі пасялковы і 88 – у сельскія Саветы дэпутатаў.

ФАРМІРУЮЦЦА ЎЧАСТКОВЫЯ КАМІСІІ

Наталля Дмухоўская таксама нагадала, што да 2 лютага ўключна ажыццяўляецца прыём дакументаў па вылучэнню прадстаўнікоў у склад участковых выбарчых камісій па выбарах дэпутатаў мясцовых Саветаў дэпутатаў Рэспублікі Беларусь 27 склікання. Ён арганізаваны з 8 да 17 гадзін у кабінеце №64 будынка райвыканкама (аддзел арганізацыйна-кадравай работы) штодня, акрамя суботы і нядзелі, якія з’яўляюцца выхаднымі. У апошні дзень падачы дакументаў (2 лютага) іх прыём будзе наладжаны па рэжыму працы ў будні дзень.

ЗАРЭГІСТРАВАНЫ ІНІЦЫЯТЫЎНЫЯ

ГРУПЫ

У раёне працягваецца вылучэнне кандыдатаў у дэпутаты мясцовых Саветаў дэпутатаў. Яно будзе доўжыцца да 10 лютага ўключна. Як паведаміла Наталля Дмухоўская, на Чэрвеньшчыне зарэгістравана 71 ініцыятыўная група грамадзян па зборы подпісаў выбаршчыкаў у падтрымку асоб, прапанаваных для вылучэння кандыдатамі ў дэпутаты: 15 – у раённы, 55 – у пасялковы і сельскія, 1 – у абласны Саветы дэпутатаў.                                            

Ігар АДАМОВІЧ