ЧАТЫРЫ ПРЫСТУПКІ ДА ПЕРАМОГІ

Аператары машыннага даення кароў з трынаццаці гаспадарак Чэрвеньшчыны сабраліся на мінулым тыдні ў ААТ «Валевачы», каб вызначыць мацнейшых у традыцыйным раённым конкурсе прафесійнага майстэрства.

Чатырма прыступкамі да перамогі сталі для іх чатыры конкурсныя заданні. Першае – візітная картка – дало магчымасць удзельнікам напоўніцу раскрыць творчыя таленты. У вершах распавялі пра сябе і сваю прафесію Таццяна Скроцкая з ААТ «Раванічы», Аксана Карпенка з ААТ «Лядзенскі», Ніна Ласіца з ПСГ «Дамавіцкі» ААТ «Мінскі падшыпнікавы завод», Марыя Смык з філіяла «Новыя Зелянькі» ААТ «Гарадскі малочны завод №1″, Галіна Калтовіч з філіяла «Аграбуд» ААТ «Мінскжалезабетон». Прыгожа і душэўна спявалі Наталля Пархомчык з эксперыментальнай базы «Натальеўск», Інга Сафарэвіч з ААТ «Запольскае» і Таццяна Баброва з ААТ «Крыніца Ігуменшчыны». З «групай падтрымкі» выступалі Жанна Хурсевіч з сельгаспрадпрыемства «Ганута-Агра» і Ніна Бабовіч з ААТ «Валевачы». Па-сялянску нязмушана прадставіў сябе Іван Забаронак з філіяла СГК «Велікаполле» КУП «Мінсктранс». Арыгінальнай была візітная картка Віктара Пыжа з ААТ «10 з’езд Саветаў», які на сцэне… «даіў карову». Вельмі спадабаўся ўсім «усходні танец» у выкананні Святланы Зыль з філіяла «АграБокс-Заатэх» СП «Унібокс». Эмацыйна падбадзёрвалі сваіх прадстаўнікоў і шчыра непакоіліся за іх старшыні прафкамаў і спецыялісты заатэхнічнай службы гаспадарак.

Далей для канкурсантаў пачаліся больш сур’ёзныя выпрабаванні. Падчас комплекснай праверкі тэарэтычных ведаў многія з іх хваляваліся, нібыта студэнты на экзамене. Бо адна справа – прымяняць свае веды на практыцы, зусім іншая – дакладна адказаць на пытанні білетаў. І хаця строгае журы пад старшынствам першага намесніка начальніка райсельгасхарчу Віктара Ляснеўскага выставіла аператарам машыннага даення розныя адзнакі за гэты конкурс, справіліся з ім усе.

Падчас разборкі-зборкі даільнага апарата на хуткасць і паслядоўнасць шмат каму з удзельнікаў спаборніцтва давялося ўзгадваць даўно забытыя маніпуляцыі, бо тэхнічны прагрэс на фермах крочыў наперад, і неўзабаве, як хтосьці пажартаваў, такія апараты зоймуць месца ў музеі.

Затое на МТФ «Валевачы», дзе канкурсантам неабходна было паказаць навыкі валодання тэхналогіяй машыннага даення, яны апынуліся ў сваёй стыхіі. Хаця і тут адзнакі былі рознымі: больш паспяхова справіліся з заданнем аператары з тых гаспадарак, у якіх сучасныя метады даення асвоілі першымі ў раёне.

Падлічыўшы суму балаў за чатыры конкурсы, журы вызначыла пераможцаў. Першае месца заняла Святлана Зыль з філіяла «АграБокс-Заатэх» СП «Унібокс», другое – Наталля Пархомчык з эксперыментальнай базы «Натальеўск», трэцяе – Галіна Калтовіч з філіяла «Аграбуд» ААТ «Мінскжалезабетон». Яны атрымалі падарункі з рук першага намесніка старшыні райвыканкама, начальніка райсельгасхарчу Івана Малахава.

У трох намінацыях адзначыў удзельнікаў конкурсу Мінскі абкам прафсаюза работнікаў аграпрамысловага комплексу. Загадчык аддзела па сацыяльна-эканамічнай рабоце гэтай арганізацыі Аксана Бельская ўручыла прызы Віктару Пыжу з ААТ «10 з’езд Саветаў» (за волю да перамогі), Інзе Сафарэвіч з ААТ «Запольскае» (за лепшую візітную картку) і Ніне Бабовіч з ААТ «Валевачы» (за шматгадовую добрасумленную працу). Акрамя таго, Інга Сафарэвіч атрымала сувенір ад аддзела ідэалагічнай работы, культуры і па справах моладзі райвыканкама.

А ўвогуле, дзякуючы клопатам старшыні райкама прафсаюза работнікаў АПК Тамары Сакалоўскай (менавіта гэтая ўстанова сумесна з райсельгасхарчам ладзіла мерапрыемства) і спонсарскай падтрымцы, без падарунка не застаўся ніводзін канкурсант.

Па адзінадушнаму меркаванню ўдзельнікаў, конкурс прайшоў на добрым арганізацыйным узроўні. Усё тут, ад уласна спаборніцтваў, да смачнага абеду і цудоўнага канцэрту, спрыяла стварэнню таварыскай, гасціннай атмасферы сапраўднага свята.

Ігар АДАМОВІЧ. Фота аўтара

Тэарэтычны іспыт «здае» Іван Забаронак з філіяла СГК «Велікаполле»