ЛЕПШЫЯ МАШЫННЫЯ ДВАРЫ ВЫЗНАЧЫЎ КОНКУРС

Спаборніцтва складалася з двух этапаў. Першы ўключаў у сябе  арганізацыйныя і падрыхтоўчыя мерапрыемствы. Падчас другога адмыслова створаная камісія, у склад якой увайшлі прадстаўнікі райсельгасхарчу, райаграсервіса, раённых інспекцый Дзяржтэхнагляду, прыродных рэсурсаў і аховы навакольнага асяроддзя, аддзела па надзвычайных сітуацыях, цэнтра гігіены і эпідэміялогіі, прафсаюза работнікаў АПК, сродкаў масавай інфармацыі праверыла ў гаспадарках стан рамонтных майстэрняў і пунктаў тэхнічнага абслугоўвання, гаражоў для трактароў і аўтамабіляў, пляцовак для доўгатэрміновага захоўвання сельскагаспадарчай тэхнікі, стаянак рабочых машын, трактароў, аўтамабіляў, размяшчэння тэхнікі, якая чакае рамонту, складоў запасных частак, абменных вузлоў і агрэгатаў, вытворча-бытавых памяшканняў для механізатараў, іншых аб’ектаў, а таксама адпаведную дакументацыю.

Камісія, у прыватнасці, адзначыла, што ў большасці сельскагаспадарчых арганізацый раёна прыняты меры па падрыхтоўцы рамонтных майстэрняў да працы ў зімовых умовах, тэхніка пастаўлена на доўгатэрміновае захоўванне, прадэфектавана, арганізаваны яе рамонт.

У добрым стане ўтрымліваюцца машынныя двары ў ААТ «Валевачы», «Раванічы», сельгасфіліялах «Аграбокс» СП «Унібокс», «Новыя Зялянькі» КУП «ГМЗ № 1″, «Аграбуд» ААТ «Мінскжалезабетон», эксперыментальнай базе «Натальеўск», ПСГ «Дамавіцкі» ААТ «Мінскі падшыпнікавы завод», філіяле СГК «Велікаполле» КУП «Мінсктранс» і іншых.

Праведзены асобныя работы па паляпшэнню стану аб’ектаў машыннага двара і навядзенню тэхналагічнага парадку. Зроблены рамонт розных аб’ектаў машынных двароў, агароджаў тэрыторый у ААТ «Валевачы», ПСГ «Дамавіцкі» ААТ «Мінскі падшыпнікавы завод», сельгасфіліялах «Аграбуд» ААТ «Мінскжалезабетон» і «Новыя Зялянькі» КУП «ГМЗ № 1″, эксперыментальнай базе «Натальеўск», ААТ «Чэрвеньскі райаграсервіс» . Разам з тым , у сельгаспрадпрыемстве  «Ганута-Агра», ААТ «10 з’езд Саветаў», «Запольскае», «Крыніца Ігуменшчыны» вельмі нездавальняюча падрыхтаваліся да агляду машынных двароў . У гэтых гаспадарках адсутнічае тэхналагічны парадак на машынных дварах, не ўсе аб’екты, пляцоўкі пазначаныя шыльдамі з надпісам па іх прызначэнню, тэхніка захоўваецца з парушэннямі патрабаванняў Дзяржстандарту, спісаныя машыны не разабраны, захоўваюцца разам з тымі, якія знаходзяцца на балансе, не распрацавана неабходная дакументацыя па арганізацыі рамонту тэхнікі. У сельгаспрадпрыемстве  «Ганута-Агра», ААТ «10 з’езд Саветаў» рамонтныя майстэрні да працы ў зімовых умовах падрыхтаваны нездавальняюча, тэхнічнае абслугоўванне трактароў праводзіцца бессістэмна.

На падставе зробленых камісіяй высноў, раённы выканаўчы камітэт прыняў рашэнне аб выніках агляду. У адпаведнасці з ім, першае месца не прысуджана нікому, паколькі ніводная з гаспадарак не выканала ўмовы агляду ў поўным аб’ёме.

Другое месца прысуджана эксперыментальнай базе «Натальеўск», трэція – сельгасфіліялам «Новыя Зялянькі» КУП «ГМЗ № 1″ і «Аграбуд» ААТ «Мінскжалезабетон». Названыя гаспадаркі атрымалі прэміі ў памеры 30 і 20 базавых велічынь за другое і трэція месцы, адпаведна.

Згаданым рашэннем кіраўнікам сельгаспрадпрыемства «Ганута-Агра», ААТ «10 з’езд Саветаў», «Запольскае», «Крыніца Ігуменшчыны» дадзены тэрмін для ліквідацыі выяўленых падчас агляду недахопаў у падрыхтоўцы рамонтнай базы да працы ў зімовых умовах, захоўванні тэхнікі і арганізацыі яе рамонту, навядзення тэхналагічнага парадку на тэрыторыях машынных двароў.

І.УЛАДЗІМІРАЎ