ВУЧЫМСЯ БАЧЫЦЬ ПРЫГОЖАЕ

cherven.by Новости Червеня | 16-01-2014

Напрыканцы снежня педагогі і навучэнцы Цэнтра творчасці дзяцей і моладзі г.п.Смілавічы атрымалі шчаслівую магчымасць пагутарыць з мастаком, дызайнерам, беларускай сюрэалісткай Надзяй Бука.

Яна любіць яркія фарбы і лічыць, што сэнс яе жыцця – дарыць людзям казку. Менавіта Надзя Бука стварыла новы від дэкаратыўна-прыкладнага мастацтва – буцінанку. Ажурныя ўзоры, выразаныя з паперы, больш знаёмыя нам пад назвай «выцінанка». «Нашы бабулі і прабабулі выразалі з паперы шторы, абрусы, сурвэткі. А часам нават якіхсьці казачных герояў, – кажа Надзя. – Часта выразалі сімвалы неба, зямлі і ўрадлівасці. Такія ажурныя, сіметрычныя ўзоры. Звычайна ў ход ішлі вялікія нажніцы, якімі стрыгуць авечак альбо кусты». Назва «буцінанка» нарадзілася з трох слоў: папера (рус. – бумага), выцінанка і Бука.

Лагодная, таварыская, выпраменьваючая святло і станоўчую энергетыку, Надзя змагла з шэрага дня зрабіць самы запамінальны. Для ўсіх жадаючых яна правяла майстар-клас па вырабе паштоўкі-буцінанкі. А затым наведала ўсе творчыя майстэрні нашага Цэнтра.

«У маіх работах таксама можна ўбачыць традыцыйную беларускую сімволіку, – тлумачыць мастачка . – Але ў іх ёсць асіметрыя. Буцінанка – гэта такая сюрэалістычная кампазіцыя, якую я прыдумляю сама. Яе галоўнае адрозненне ад выцінанкі ў тым, што гэта мае ідэі, мае асабістыя сімвалы, інтэрпрэтаваныя пад сучаснасць».

У руках мастака мы прывыклі бачыць пэндзаль, аловак або крэйду, але ніяк не нажніцы. Наша гераіня параўноўвае сваё рамяство з мультыплікацыяй. «Гэта вельмі цікава , – тлумачыць Надзя. – Карпатлівая праца, у якой заўсёды ёсць доля сюрпрызу і казкі. Калі я малюю і выразаю, яшчэ невядома, што атрымаецца ў канчатковым выніку. Потым я перагортваю ліст, кладу яго на якісьці фон і бачу зусім іншую кампазіцыю. Быццам глядзіш мультфільм».

Галоўных і ўжо даволі вядомых персанажаў Надзіных карцін клічуць пігласамі. Гэтыя крылатыя істоты сімвалізуюць дабро і натхненне. «Гэта такое вока, якое аберагае добрых творцаў. Яно падобна да анёла, але ўсё-такі крыху больш прыземленае, – тлумачыць Надзя. – Істота, якая нагадвае птушку. Проста я дадала воку крылы, і яно паляцела».

Надзя была захоплена і работамі выхаванцаў Цэнтра. Яна адзначыла, што галоўнае ў творчасці – уменне бачыць і перадаць у сваёй працы той вобраз, які ты сам бачыш і адчуваеш. Кожнаму жадаючаму мастачка змагла даць слушную параду, а напярэдадні навагодніх святаў пажадала ўсім індывідуалізму і прафесійнага росту ў творчасці.

Святлана ХАСЯНЕВІЧ, метадыст.

Фота Алы ШЫДЛОЎСКАЙ

Заметили ошибку? Выделите текст, нажмите Ctrl+Enter и оставьте замечание!

Написать комментарий

Информация

Чтобы написать комментарий вам нужно авторизоваться или зарегистрироваться

Обращались ли вы за помощью в милицию?