“Беларусы – народ герояў”

У Лучскай бібліятэцы нядаўна правялі гістарычную віктарыну “Беларусы — народ герояў”. Пытанні задаваліся розныя, тыпу — Дата заканчэння вайны? Чаго напалі на Беларусь? Дзе дзейнічалі партызанскія атрады? Што б ты зрабіў у час вайны? Юныя чытачы адказвалі грунтоўна і сур’ёзна. Шкада, не ведалі сваіх мясцовых герояў.
Разам з дзецьмі арганізавалі пастаянную выставу “Беларусы — народ герояў” з партрэтамі землякоў: М.Казачэнкі, Т.Кушнер, Л.Міхіевіча.
На стэндзе “Землякі” змешчаны здымкі афішаў розных гадоў. Партрэт народнай артысткі БССР Веры Пола, фальклорны гурт “Рэчкі”, які існаваў у 70-я гады. Тут жа і медаль “Удзельніку Першага Усесаюзнага фестывалю самадзейнай творчасці працоўных”. Афіша беларускага народнага ансамбля “Радзімічы”, здымкі Франчэскі Ліпскай, салісткі гэтага ансамбля, якая, дарэчы, з вёскі Прамень.
Юныя чытачы з цікавасцю разглядвалі стэнд “Землякі”. Мы ганарымся і памятаем, што культурная спадчына вельмі адметная. Прыходзяць у бібліятэку дзеткі з неблаганадзейных сем’яў. У параўнанні з бацькамі — дзеці шмат чытаюць. Асабліва любяць чытаць выразна, таму гучныя чытанні праводзім часта і з вялікім задавальненнем для ўсіх.
Адбыўся ў нас таксама конкурс “Што запомніў у школе?”. Творча аднесліся, у асноўным гучалі вершы Р.Барадуліна. В.Віткі, М. Чарняўскага. Асабліва кранальны гімн Лядзенскай школы, якую выканалі так шчыра і непасрэдна Валерыя Сарокіна, Крысціна Стрычык, Арцём Князік. Радуе тое, што дзеці натхнёна спявалі, з гонарам, а яшчэ і тое, як яны прыгожа расказваюць аб сваёй настаўніцы Ганне Аляксандраўне Ворнік. Усё тое, чаму яна навучыла, гэта здабытак яе нястомнай працы.
Старэйшая група чытачоў падрыхтавала шаржы-малюнкі “Упрыгожым свет”. Забаўляльныя малюнкі ў Ігара Корзюка, Крысціны Кушнер, Дашы Касцючэнка. Лена Дубовік прапанавала правесці конкурс на лепшую сядзібу. Мы рыхтуемся.
Прыгожымі радамі стаяць каля ўваходу бібліятэкі стульчыкі для дзятвы, якія змайстравалі самі з адпрацаванага дрэва Косця Аляксеенка і Дзіма Дубовік. Гэта дарунак нашай установе, бо хлопчыкі зараз здаюць экзамен за 9 клас і будуць паступаць вучыцца.
Спадзяванняў і планаў шмат, работы з дзецьмі — таксама. Галоўнае, каб меней бадзяліся без прытулку, каб быў занятак. А дэвіз нашай бібліятэкі “Большкультуры — менш агрэсіі”.

Таццяна Ждановіч,
загадчыца Лучскай бібліятэкі