Аляксей Якімовіч ведае, калі кукуе зязюля

У чацвер, 24 кастрычніка, у СШ №3 адбылася прэзентацыя новай кнігі “Калі кукавала зязюля” слонімскага аўтара Аляксея Якімовіча.

[View the story "Аляксей Якімовіч ведае, калі кукуе зязюля" on Storify]

— Некалі я для сябе вырашыў пісаць на кожнае стагоддзе адну прыгодніцкую гістарычную аповесць. Пісаў я свае творы на аснове гістарычных падзей, значных для нашай краіны. У беларусаў была такая навука — прымі падарожнага, бо сам будзеш у дарозе. Гэтая жыццёвая традыцыя паступова стала разбурацца. Пра гэта я напісаў у кнізе “Калі кукавала зязюля”, — распавёў падчас прэзентацыі Аляксей Якімовіч.

У кнізе “Калі кукавала зязюля” змешчаны дзве аповесці. Адна з іх называецца “Калі кукавала зязюля”, дзе апавядаецца пра 1532 год на Слонімшчыне, калі ішла жорсткая вайна з Масковіяй. Аўтар узяў за аснову аповесці наступ рускіх акупантаў на наш край.

Другая аповесць мае назву “Панскае дзіця”. У ёй паказаны гістарычныя падзеі і няпростыя адносіны з Расіяй у 1794 годзе, у час паўстання пад кіраўніцтвам Тадэвуша Касцюшкі.

У кнізе аўтар выкарыстаў назвы вёсак і мясцін Слонімскага раёна.

Падчас прэзентацыі выступілі супрацоўнікі Слонімскай цэнтральнай раённай бібліятэкі імя Я. Коласа, якія расказалі прысутным пра творчасць пісьменніка.

Сам аўтар кнігі асаблівую ўвагу ўдзяліў Алене Прусевіч, якая ў мінулым годзе напісала навуковую працу па творчасці Аляксея Мікалаевіча. Тады на міжнароднай канферэнцыі ў Гродне дзяўчына са сваёй працай заняла першае месца.

Аляксей Якімовіч правёў для дзяцей невялікую віктарыну, пасля якой самыя знаходлівыя атрымалі паштоўкі з аўтографам Аляксея Мікалаевіча.

— Літаратура — гэта неад'емная частка мяне. Пісаць я пачаў з самага дзяцінства. Літаратура з’яўляецца свайго родам наркотыкам. Я ведаю, што ад мяне чакаюць новых апавяданняў, і я не магу падвесці чытача, — напрыканцы дадаў Аляксей Мікалаевіч.