Госці з Літвы наведалі Ашмяны, каб абмеркаваць дэталі транспамежнага праекту «Дзве стараны – адна гісторыя і культура»

На мінулым тыдні Ашмянскі раён наведалі госці з Літоўскай Рэспублікі: калегі па рэалізацыі сумеснага міжнароднага праекта “Дзве стараны – адна гісторыя і культура”, які ажыццяўляецца ў рамках Праграмы трансгранічнага супрацоўніцтва Латвія – Літва – Беларусь. Ганна Матвейка – каардынатар праекта, Гражына Галубоўска – менеджар і Эльвіра Вішнеўская – фінансавы менеджар прыехалі, каб абмеркаваць далейшы ход запланаваных мерапрыемстваў і ўдакладніць некаторыя пункты працэдуры адміністрыравання праекта.

Напачатку госці сустрэліся са старшынёй райвыканкама Міраславам Сарасекам, а затым разам з намеснікам старшыні райвыканкама Галінай Люткоўскай, начальнікам аддзела культуры Галінай Балінскай, каардынатарам праекта з нашага боку Сяргеем Жылікам, спецыялістамі, якія садзейнічаюць ажыццяўленню праекта, абмеркавалі некаторыя моманты маючага адбыцца на ашмянскай зямлі фестывалю “Гальшанскі замак”, пытанні падрыхтоўкі каталога “Майстры прыгранічнага рэгіёна”, а таксама сумеснага турыстычнага маршруту, які працягнецца ад Вільні да Ашмян.

Каталог “Майстры прыгранічнага рэгіёна” прадэманструе шматграннасць народных талентаў двух суседніх раёнаў – Вільнюскага і Ашмянскага. З нашага боку запланавана ўключыць у каталог сем народных майстроў: Ганну Ціхаміраву (мяккая цацка), Валянціну Свірскую (саломапляценне), Алену Будзько (выцінанка), Уладзіміра Бізюка (жывапіс), Наталлю Ромаш (пап’е-машэ, воўнакачанне), Леанарду Казіміраву (жывапіс, графіка) і Віктара Гардзевіча (бісерапляценне, вырабы з выкарыстаннем прыродных матэрыялаў). У выданні будзе змешчана інфармацыя пра саміх майстроў і віды дэкаратыўна-прыкладнога мастацтва, распаўсюджанага ў нашым раёне, а таксама здымкі з гатовымі работамі народных майстроў. Тэкст будзе пададзены на чатырох мовах: беларускай, літоўскай, рускай і англійскай.

Таксама згодна з планам ажыццяўлення праекта рыхтуецца набор паштовак “Скарбы Ашмянскага краязнаўчага музея”, на якіх будуць прадстаўлены ўнікальныя рэчы, звязаныя з жыццём і дзейнасцю Францішка Багушэвіча, прадметы, знойдзеныя падчас раскопак на тэрыторыі нашага раёна, і інш. За сродкі, выдаткаваныя з праекта, у краязнаўчы музей закуплены вітрыны і стэлажы, на чарзе – закуп тэхнічнага мультымедыйнага абсталявання.

Турыстычны маршрут ад Вільні да Ашмян складаецца з некалькіх частак. Першая – віртуальная, уяўляе сабой сайт, на якім можна будзе азнаёміцца са славутасцямі ашмянскай і віленскай зямлі. Тут жа можна будзе праверыць гістарычныя веды пра свой край у віртуальнай гульні і атрымаць у выніку паспяховых адказаў рэальны прыз. Літоўскі бок рыхтуе гістарычны буклет, а мы – карту са здымкамі славутасцяў. У спіс слаўных мястэчак Ашмяншчыны ўключаны Ашмяны з помнікамі архітэктуры, Гальшаны з руінамі замка і гарадзішчам, геадэзічны пункт Дугі Струвэ Тупішкі, Баруны, Жупраны, Паляны і коннаспартыўны цэнтр “Гіпіка”. На літоўскім маршруце можна будзе знайсці звесткі пра замак у Медніках, касцёл у Рукойнях, дзе, дарэчы, хрысціўся Францішак Багушэвіч, музей Уладзіслава Сыракомлі ў Барэйкішках, этнічную вёску Крыжоўка (штосьці блізкае да нашых Дудутак), пункт Дугі Струвэ, размешчаны на тэрыторыі Вільнюскага раёна.

Што тычыцца фестывалю “Гальшанскі замак”, то ён запланаваны на 23-24 жніўня. З літоўскага боку мяркуецца прыезд 80 гасцей. Гэта і народныя майстры, і мясцовыя паэты, і калектывы мастацкай самадзейнасці. Тэатралізаваная частка мерапрыемства, якую рыхтуюць нашы работнікі культуры, уразіць гасцей фэсту шыкоўнымі касцюмамі гістарычных персанажаў. Згодна з умовамі праекта пашыты 20 касцюмаў, якія чакаюць свайго творчага дэбюту. У праграму свята ўключаны таксама прэзентацыя сумеснага паэтычнага зборніка ашмянскіх і віленскіх паэтаў, у які увойдуць вершы як сучаснікаў, так і слынных творцаў мінулых стагоддзяў. Для журналістаў і ўсіх зацікаўленых асоб запланавана прэс-канферэнцыя з непасрэднымі ўдзельнікамі і выканаўцамі праекта Еўрасаюза “Дзве стараны – адна гісторыя і культура”. Праз рэалізуемы праект наладзіліся сувязі паміж бібліятэчнымі работнікамі, а таксама супрацоўнікамі музеяў двух раёнаў. Магчыма, у жніўні гэтыя стасункі набудуць больш афіцыйны характар – плануецца падпісанне дамовы аб супрацоўніцтве паміж гэтымі ўстановамі.

Аліна САНЮК
Фота аўтара