У Ашмянскім раёне прайшло свята народнай культуры “Землякі”

Праект «Стварэнне і дзейнасць клуба старастаў вёсак «КУТ», які на працягу года рэалізоўваўся на тэрыторыі Мураванаашмянкоўскага сельсавета, завяршыўся святам народнай культуры пад назвай “Землякі”. У суботу ў клубе аграгарадка было шматлюдна, як ніколі. Месцічы накіраваліся ў цэнтр культурнага жыцця не толькі каб пабачыць канцэртную праграму лепшых калектываў раёна, але, найперш, каб парадавацца за жыхароў сельсавета, якія прымалі актыўны ўдзел у ажыццяўленні праекта і сталі праваднікамі ў свет карысных ідэй. Дарэчы, пладамі гэтай дзейнасці змогуць карыстацца ўсе.
У будынку, дзе размяшчаецца бібліятэка, з’явіўся музейны пакой. Тут сабраны звесткі пра нашага выбітнага суайчынніка, які пакінуў значны след у гісторыі Беларусі – вялікага маршалка літоўскага, палітыка і дыпламата, складальніка дапаможнiка па конегадоўлi «Гіпіка, альбо Кніга пра коней” Крыштафа Монвіда Дарагастайскага. Для юных жыхароў сельсавета абсталявалы цэнтр творчасці, дзе пад кіраўніцтвам дарослых дзеці змогуць навучыцца шыць, працаваць з саломкай, асвояць тэхніку пескаграфіі і малюнкаў на твары — аквагрыму, у вольны час будуць маляваць, выпальваць розныя ўзоры на драўляных паверхнях, гуляць у шашкі і шахматы. У скверы паблізу школы з’явіліся лаўкі для адпачынку. Пры мясцовай бібліятэцы створаны сацыяльна-інфармацыйны цэнтр, для якога закуплены стэнды, ноўтбук, тэлевізар, тры веласіпеды (для дзяцей-валанцёраў, якія будуць аказваць дапамогу бібліятэкару) і электронны танометр. Для тэатралізаваных прадстаўленняў пашыты два касцюмы гістарычных персанажаў.
Праект гэты стаў пераможцам у конкурсе міні-праектаў ТАНДЭМ — III, фінансуемых на тэрыторыі Беларусі ў рамках міжнароднай тэхнічнай дапамогі. У выніку ён быў адобраны Еўракамісіяй у намінацыі «Партнёрства паміж мясцовымі ініцыятывамі і ўладай». Пры падтрымцы аддзела ідэалагічнай работы, культуры і па справах моладзі райвыканкама, работнікаў раённай бібліятэкі, мясцовай улады ажыццяўленнем яго займаліся работнікі сельскага Дома культуры, бібліятэкі, старасты вёсак і неабыякавыя і актыўныя жыхары сельсавета.
На рэалізацыю праекта было прадугледжана 10900 долараў (9900 долараў выдаткавана Еўрасаюзам, 1000 — бюджэтныя сродкі раёна). Гэтыя грошы пайшлі не толькі на набыццё вышэйпералічанага абсталявання і рэалізацыю добрых спраў, але і на заахвочванне пераможцаў конкурсаў “Лепшы гаспадар” і “Замалёўкі з вандроўкі”. У конкурсе “Лепшы гаспадар” дыпломамі і падарункамі адзначаны Генрык Курпіцкі, Яніна Маркоўская, у гаспадарцы якіх з’явяцца тачкі “Дачная” і садовыя апырсквальнікі, Франц Стасюкевіч, Аляксандр Габрыяловіч (мотакаса “Эка”), Ірына Тамашэвіч (мотакаса “Хускварна).
У конкурсе дзіцячага малюнка дыпломы і сертыфікаты атрымалі Аляксандр Аўдзейчык, Віялета Захарка (3 месца), Юлія Сямёнавас (2 месца), Кацярына Малышка, Карына Гіруць (1 месца). Дыпломам узнагароджаны настаўнік Мураванаашмянкоўскага ВПК, мастак Сяргей Савасцінкевіч.
За рэалізацыю конкурса “Добрая справа” дыпломы ўручаны Таццяне Ціхановіч (за стварэнне музейнага пакоя), Марыне Саковіч (цэнтр творчасці), Уладзіслаў Каспяровіч (зона адпачынку).
Шыкоўным падарункам для мясцовых жыхароў стаў канцэрт, у якім прынялі ўдзел фальклорная група Мураванаашмянкоўскага сельскага клуба, народныя калектывы “Крыніцы” (раённы цэнтр культуры), “Жытніца” (Кракоўскі аддзел культуры і вольнага часу), “Граўжанцы” (Граўжышкоўскі аддзел культуры і вольнага часу), “Джана Рома” (раённы цэнтр культуры), вакальны ансамбль “Сустрэча” (Будзёнаўскі сельскі клуб) і народны ансамбль народнай песні “Хутарок” са Смаргоні.