Артыфакты гісторыі збірае на Ашмяншчыне слесар-сантэхнік

Гродненская правда - Ошмяны Новости Ошмян | 11-10-2016

Ля гэтага дома ў вёсцы Мардасы на Ашмяншчыне проста нельга не спыніцца. А спыніўшыся, можна гадзінамі разглядваць і веснічкі, зробленыя з ручак старых швейных машын, і дарожку ад іх да дому, выкладзеную камянямі ад старых жорнаў. На сценах дома, гаспадарчых пабудоў, на плоце – цэлы арсенал вагаў-бязменаў, лямпаў, замкоў, падкоў, колаў ад вазкоў, іншых старых рэчаў.
Аўтар гэтага незвычайнага аздаблення – 50-гадовы гаспадар сядзібы Ігар Спірыдовіч, слесар-сантэхнік Ашмянскага прадпрыемства ЖКГ (партрэт яго сёлета занесены на Дошку гонару). А па жыцці – заўзяты калекцыянер і паэт-байкапісец.
– Вершы стаў пісаць недзе ў класе трэцім, – расказвае Ігар. – Найбольш удаюцца байкі. Дарэчы, яны і маім чытачам больш падабаюцца. Падставай для натхнення можа быць любое пачутае слова, камічная сітуацыя з жыцця, выпадкова пачуты анекдот.
Не адно дзесяцігоддзе стажу мае і яго страсць да збіральніцтва.
– Збіраю ўсе прадметы старыны, – гаворыць Ігар. – Знаходжу іх на гарышчах старых, закінутых хутароў, хат, калі людзі рыхтуюць да продажу бацькоўскі дом ці рамантуюць яго, выкідваючы ўсё непатрэбнае. Прашу тады, каб пусцілі мяне на гарышча ці ў пуню, шукаю там цікавыя рэчы. Старых лямпаў у мяне не адзін дзясятак. Шмат замкоў, ключоў, ночваў, прасаў, рыдлёвак, сякераў, прадметаў хатняга абіходу, сялянскіх прылад працы. Сярод рэдкіх – латунная гільза ад артылерыйскага снарада часоў Першай сусветнай вайны: выбіты на ёй цікавы малюнак да гэтага часу добра захаваўся.
Старыя паштоўкі, прадуктовыя картачкі, фотаальбомы – усё гэта калекцыянер таксама збірае. У калекцыі манет нямала рэдкіх, якія знайшоў сам або падарылі сябры.
– Знаходжу старыя лыжкі, куфры, шафы, іншую мэблю. Але не бяру – некуды ставіць.
У планах калекцыянера – пабудаваць асобны дом пад калекцыю, каб можна было збіраць і больш маштабныя рэчы.
У дварышчы Спірыдовічаў любяць бываць дзеці, ды і дарослыя госці спыняюцца, цікавяцца артэфактамі гісторыі. Сваімі знаходкамі Ігар дзеліцца з музеем Кальчунскай школы.

Заметили ошибку? Выделите текст, нажмите Ctrl+Enter и оставьте замечание!

Написать комментарий

Информация

Чтобы написать комментарий вам нужно авторизоваться или зарегистрироваться

Обращались ли вы за помощью в милицию?