Рэканструкцыя будынкаў у Гродна ў ХІХ ст.

У ХІХ ст. любы рамонт у Горадні, будова і перабудова ажыццяўлялася паводле дамовы падрада. У горадзе было шмат будаўнікоў-падрадчыкаў, якія маглі прапанаваць свае паслугі. Адным з іх быў рускі купец, выхадзец з сялянаў, Кірыл Лысянкоў, пiша блогер supron-licvin. Гэта быў вельмі неадназначны чалавек, па горадзе хадзіла шмат чутак пра яго. Гаварылі, што ён, не маючы ні граша, неяк умудраўся выйграваць конкурсы на заключэнне дамовы падрада для рамонту гарадскіх будынкаў, прапаноўваючы найменшую ўзнагароду за сваю працу. Гарадскія ўлады ён запэўніваў у тым, што яго ўмовы з’яўляюцца самымі выгоднымі для гарадской казны.

Тэрмін здачы аб’ектаў звычайна ставіліся невялікія, але затым гэты чалавек адцягваў яго на некалькі гадоў. Будынак прыходзіў у запусценне, прызнаваўся непрыгодным для эксплуатацыі. Затым на гэтым самым месцы ўзводзілася “новое прочное здание”. Ідэальная схема, хаця гараджане абураліся, што купец разбураў тое, што некалі было “прочно построено”.

Аднойчы гэты падрадчык рамантаваў агароджу ля гарадскога сада. Старую агароджу, даволі нармальнага стану, ён паставіў на сваім участку, што месціўся ля станіславоўскай дарогі. Тут ён будаваў свой дом, які не мог дакончыць з-за адсутнасці фінансаў.

Лысянкоў арандаваў памяшканні на другім паверху мезаніна ў ратушным будынку. Невядома з якой мэтай тут ён “павыймаў вокны і ўсё прывёў у запусценне, бо цяпер няма ў большай частцы ні вокнаў, ні дзвярэй”. Праз некаторы час, у 1869 г., гарадскія ўлады задумалі правесці рамонт у гасцінным двары (будынак былой ратушы), якая да таго часу “имела плачевный вид”: працякаў дах, патрэскаліся сцены, пагнілі кроквы. Лысянкоў прапанаваў свой план па перабудове гэтага будынка за 80 тыс.руб. Паводле плана купца, будынак ратушы трэба было знесці, а на яго месцы пабудаваць двухпавярховы гасцінны двор з лаўкамі і крамамі. Своеасаблівы гандлёвы цэнтр ХІХ ст.! На шчасце, гэты праект не ўдалося зрэалізаваць з-за недахопу сродкаў.