Сярод лаўрэатаў першай Нацыянальнай літаратурнай прэміі – гродзенская дзіцячая пісьменніца Ганна Скаржынская-Савіцкая

На Дні беларускага пісьменства ў Шчучыне дзея разгарнулася адначасова на некалькіх пляцоўках. Багата гасцей, у тым ліку пісьменнікаў з Беларусі і замежных краін, завіталі на ўрачыстае адкрыццё свята. Тут гасцей віталі намеснік прэм’ер-міністра Беларусі Міхаіл Русы, намеснік главы Адміністрацыі Прэзідэнта краіны Ігар Бузоўскі, мiнiстр культуры Барыс Святлоў, памочнiк Прэзiдэнта Рэспублiкi Беларусь - галоўны iнспектар па Гродзенскай вобласцi Сяргей Раўнейка, старшыня абласнога выканаўчага камітэта Уладзімір Краўцоў i яго намеснiк Вiктар Лiсковiч, Архіепіскап Гродзенскі і Ваўкавыскі Арцемій, а таксама старшыня Шчучынскага райвыканкама Сяргей Ложэчнік. Ігар Бузоўскі зачытаў прывітанне Прэзідэнта краіны Аляксандра Лукашэнка ўдзельнікам свята.

У святочны дзень у адрас беларускіх творцаў і кніг гучала багата добрых словаў. Выдавецтвы прадставілі самыя лепшыя кнігі, якія атрымалі прызнанне не толькі ў Беларусі, але і за яе межамі. Як прыклад – фотаальбом “Беларусь замкавая”, які выклiкаў вялікую цікавасць на міжнароднай кгніжнай выстаўцы, што праходзіць у Маскве. Дарэчы, выданне атрымала гран-пры Нацыянальнага конкурса “Мастацтва кнігі”. Тады ж узнагародамі былі адзначаны 12 беларускіх выданняў – усе іх можна было пабачыць у Шчучыне.

У скарбонку ўзнагарод беларускія кнігі паклалі яшчэ колькі дыпломаў. Іх атрымалі пераможцы першай Нацыянальнай літаратурнай прэміі, уручэнне якой было адным з самых чаканых момантаў. Чаканым яшчэ і таму, што імёны лаўрэатаў да апошняга трымаліся ў сакрэце.

Як распавялі міністр інфармацыі Беларусі Лілія Ананіч і старшыня пісьменніцкай арганізацыі Мікалай Чаргінец, на конкурс было даслана 45 прац у сямі намінацыях. Аднак сёлета журы вырашыла не вызначаць пераможцу ў намінацыі “Дэбют”. Быць лаўрэатам прэміі заўсёды пачэсна, а першай – тым больш. Гродзенцам ёсць кім ганарыцца: сярод лаўрэатаў – дзіцячая пісьменніца Ганна Скаржынская-Савіцкая, узнагароджаная за кнігу “Надзейка-чарадзейка”. Лепшым празаічным творам стала кніга Уладзіміра Саламахі “І няма шляху чужога”. Тамара Краснова-Гусачэнка – аўтар лепшага паэтычнага зборніка “Встреча”. Сярод публіцыстычных твораў прэміяй адзначаны зборнік Міхаіла Шыманскага “Мы этой памяти верны”. Наталля Голубева – аўтар сцэнарыяў праграмы “Обратный отсчет” – пераможца ў намінацыі “Драматургія”. У крытыцы прэміяй адзначана кніга Дзяніса Марціновіча “Жанчыны ў жыцці Уладзіміра Караткевіча”.

Дарэчы, прэмія стала свайго роду рэкламай творцам і кнігам: да аўтараў падыходзілі з пытаннямі, дзе можна пабачыць ці набыць іх кнігу. Упэўнена, тыя, хто зробіць гэта, не пашкадуюць: творы вартыя і цікавыя. Бліжэй пазнаёміўшыся з кнігамі, якія прадставілі нашы выдавецтвы, упэнілася яшчэ ў адным: знайсці добрую, цікавую кнігу не складана. Іх тут прадстаўлена багата.










Таццяна Кузнячэнкава
http://grodnonews.by/ru/3/0/nodes?search=Автор: