За порядком в Добруше следят камеры наблюдения

Яшчэ ў 2008 годзе, калі ў Мінску ў час святкавання Дня Незалежнасці краіны спрацавала самаробнае выбухное ўстройства, стала зразумела, што без выкарыстання сучасных электронных сістэм відэаназірання абысціся немагчыма. У тым жа годзе, пры распрацоўцы раённага плана прафілактычных мерапрыемстваў па барацьбе са злачыннасцю, было прадугледжана выдзяленне сродкаў на праектаванне, набыццё і мантаж сістэмы відэаназірання. Неўзабаве на будынках вакол плошчы Леніна з’явіліся першыя электронныя наглядальнікі.– Размова ідзе не аб татальным сачэнні за гараджанамі, а аб іх бяспецы, папярэджанні магчымых і раскрыцці ўжо ўчыненых злачынстваў, – расказаў аб задачах новай сістэмы назірання начальнік штаба РАУС маёр міліцыі С.Г.Гаршуноў. – Менавіта з дапамогай такой сістэмы ў кароткі тэрмін быў аператыўна раскрыты тэракт у Мінскім метро.

Сёння за цэнтральнай плошчай назіраюць тры камеры. Малюнак з іх у рэальным часе перадаецца на маніторы аператыўна-дзяжурнай службы райаддзела ўнутраных спраў. Гэта дазваляе практычна імгненна рэагаваць на любыя здарэнні, асабліва ў час масавых мерапрыемстваў. Да слова, дзякуючы камерам праваахоўнікі неаднойчы папярэджвалі правапарушэнні, у тым ліку і бойкі каля піцейных устаноў, крадзёж дэкаратыўных раслін з клумбаў.

Магчымасці новай сістэмы даволі шырокія. Так, пры жаданні, можна дэталёва разгледзець і зафіксаваць твар любога пешахода на плошчы, нумар аўтамабіля, што і прадэманстраваў карэспандэнтам дзяжурны аператыўна-дзяжурнай службы Віктар Андрыянчыкаў (на здымку). Адметна, што запісы камер назірання могуць быць выкарыстаны ў судзе ў якасці доказу віны.

– Тры камеры для такога горада – вельмі мала, – расказаў С.Г.Гаршуноў. – Іх колькасць патрэбна павялічваць, тым больш, што гэта не нясе вялікіх фінансавых затрат. На першапачатковым этапе было набыта ўсё неабходнае абсталяванне, і сёння яно дазваляе падключыць да пульта дзяжурнага да 32 камер, прычым, усталяваны яны могуць быць не толькі ў райцэнтры, але і ў любым з населеных пунктаў раёна.

На думку начальніка штаба, прадпрыемствы і гандлёвыя арганізацыі маглі б за ўласны кошт устанавіць такія сістэмы ў гандлёвых залах, як гэта зроблена ў магазінах “Падкова-Буд”, “Любава”, “Вербачка”, аўтазапраўцы ці на прахадных прадпрыемстваў. Падключаць іх да пульта дзяжурнага не абавязкова. Дастаткова мець сваё запісваючае ўстройства, каб абараняць маёмасць і падтрымліваць правапарадак.

Некалькі камер паспяхова працуюць і на аўтатарасе Бранск–Кобрын. Фіксуючы аўтамабілі, якія едуць у два бакі, яны дазваляюць дакладна ўстанавіць віноўніка дарожна-транспартнага здарэння нават тады, калі ён спрабуе скрыцца з месца аварыі.

Сяргей ЧАЙДАК