Рэалізавана галоўная мэта года

Вынікі выпускнікоў гарадской гімназіі ў гэтым годзе на цэнтралізаваным тэсціраванні перавышаюць рэспубліканскі паказчык амаль у два разы. Гэта лепшы паказчык сярод школі гімназій Гомельшчыны.

Аб справах педагагічнага калектыву гімназіі, поспехах і праблемах расказвае дырэктар гэтай навучальнай установы У.П.Старасценка.

– Уладзімір Пятровіч, як вы ацэньваеце работу педагагічнага калектыву ў мінулым навучальным годзе?

– Мяркуйце самі: рэалізавана галоўная, як мы лічым, мэта года: усе выпускнікі гімназіі 2011 года знайшлі сваё месца ў жыцці – сталі студэнтамі вышэйшых навучальных устаноў краіны, нагадаю, што 20 працэнтаў выпускнікоў сталі першакурснікамі Гомельскага і Мінскага дзяржаўных медыцынскіх універсітэтаў.

Нас радуюць таксама вынікі работы са здольнымі і таленавітымі дзецьмі. Напрыклад, на раённых прадметных алімпіядах гімназісты атрымалі 90 дыпломаў. Для параўнання скажу, што такую ж колькасць дыпломаў атрымалі навучэнцы школ горада і раёна разам.

19 дыпломаў заваяваны на абласных алімпіядах. А вучаніца 9 класа Кацярына Гутарава паказала абсалютна лепшы вынік па беларускай мове і літаратуры сярод навучэнцаў вобласці і другі – у рэспубліцы.

У нашай скарбонцы – паўтара дзясятка дыпломаў за даследчыя работы, перамогі ў творчых, спартыўных конкурсах, турнірах. Па суме ўсіх паказчыкаў на працягу апошніх пяці год гімназія стабільна ўваходзіць у лік дзесяці лепшых навучальных устаноў вобласці.

– Думаецца, што для вас, навучэнцаў і іх бацькоў названыя паказчыкі маюць розную ўмоўную цану. Што скажаце наконт гэтага?

– Вядома, колькасныя паказчыкі ў нашай рабоце ў нейкай ступені ўмоўныя, яны не могуць у поўным аб’ёме аб’ектыўна адлюстроўваць уклад педагогаў. Але разам з тым яны з’яўляюцца рэальнасцю, у рознай ступені ўплываюць на лёс дзіцяці. Напрыклад, каб заваяваць дыплом на прадметных алімпіядах абласнога і рэспубліканскага ўзроўняў або атрымаць больш за 50 балаў на цэнтралізаваным тэсціраванні, патрабуюцца гады карпатлівай працы. А вось зрабіць паспяховую даследчую работу іншы раз магчыма на працягу адной навучальнай чвэрці.

Для калектыву ўсе віды дыпломаў з’яўляюцца заліковымі, а вось для навучэнцаў вельмі значныя толькі дыпломы алімпіядныя. Заўважу, што дыплом прадметнай алімпіяды прыадчыняе дзверы ў ВНУ – дыпламанту аўтаматычна, без здачы ЦТ, выдаецца сертыфікат у 100 балаў. Дыплом жа за даследчую работу такой каштоўнасці не мае.

Таму рэкамендую бацькам, дзеці якіх імкнуцца паступаць у вышэйшыя і сярэднія спецыяльныя навучальныя ўстановы, падтрымліваць жаданне наведваць факультатыўныя заняткі па падрыхтоўцы да цэнтралізаванага тэсціравання і прадметных алімпіяд.

– Уладзімір Пятровіч, якія праблемы існуюць у калектыву гімназіі, ці ёсць у яго нерэалізаваныя рэзервы?

– Ва ўсім нам патрэбна рабіць крок наперад, каб утрымацца на заваяваных пазіцыях. А для гэтага патрэбны сучасная вучэбная база, якая ў нас далёка не лепшая, павышэнне прафесіянальнага ўзроўню настаўнікаў і матывацыя навучэнцаў да вучобы. Неабходны разуменне і дапамога бацькоў, паспяховы пошук новых ідэй. Гэта і ёсць нашы нерэалізаваныя рэзервы.

– Чаго чакаеце ад новага навучальнага года?

– Скажу толькі пра новае для выпускнікоў. Распрацоўваецца праект змяненняў у правілы прыёму ў вышэйшыя навучальныя ўстановы краіны. Яны стануць больш жорсткімі. Магчыма будзе вызначана пэўная мінімальная колькасць балаў у сертыфікаце, з якім выпускнік будзе прэтэндаваць на паступленне ў ВНУ. Таму ў выпускнікоў, якія маюць нізкія або сярэднія вучэбныя паказчыкі, застаецца вельмі мала часу для ўхілення прабелаў у ведах. Таму парада тут толькі адна – тытанічная вучоба.

Мікола ШЫШОЎ