Ваенныя знаходкі

Займаючыся падрыхтоўкай склепа да зімы, жыхар пасёлка Антонаўка зрабіў нечаканую знаходку – цынк з патронамі часоў Вялікай Айчыннай вайны. Пазней супрацоўнікі міліцыі налічылі 407 патронаў калібру 7,62. Многія з іх аказаліся вельмі пашкоджанымі, а іншыя выглядалі як новыя.

– Такія знаходкі з’яўляюцца ў раёне даволі часта, – пракаменціраваў сітуацыю старшы інспектар па дазваляльнай рабоце Добрушскага РАУС Аляксандр Дудараў. – За бягучы год жыхары раёна добраахвотна здалі 10 снарадаў і мін часоў вайны. Часцей за ўсё боепрыпасы знаходзяць вясной і восенню, калі пераворваецца зямля на месцах колішніх баёў і распалажэнняў воінскіх фарміраванняў.

Па словах праваахоўніка, у многіх жыхароў раёна па сённяшні дзень захоўваюцца зброя і боепрыпасы не толькі часоў вайны, але і больш позняга года выпуску. За 9 месяцаў бягучага года было добраахвотна здадзена каля 4,5 тысячы штук патронаў, 700 грамаў пораху і тратылавых шашак, чатыры незарэгістраваныя і 18 зарэгістраваных стрэльбаў і пісталетаў.

– Нагадаю, што добраахвотная здача боепрыпасаў, зброі і выбухных рэчываў пазбаўляе іх уладальнікаў ад адказнасці, – расказаў Аляксандр Дудараў. – Тым, у каго ў ходзе аператыўных мерапрыемстваў канфіскавана 5 адзінак незарэгістраванай зброі, давядзецца адказваць па законе.

Патрэбна памятаць, што любая зброя і боепрыпасы ў незалежнасці ад фізічнага стану і года выпуску нясуць патэнцыйную небяспеку. Прадаўшы, напрыклад, стрэльбу трэцяй асобе, якая выкарыстае яе для неправамерных дзеянняў, вы можаце стаць фігурантам крымінальнай справы. Што тычыцца мін і снарадаў, то яны маюць уласцівасць узрывацца. Абараніце сябе і свае сем’і ад трагедый і непрыемнасцей.

Сяргей ЧАЙДАК