Новы і бяспечны

Многія лічаць мікрараён “Меліяратар” адасобленым куточкам Добруша. Асабліва гэта стала вылучацца, калі, у сувязі з рамонтам моста, яго “адрэзалі” ад цэнтра. Жыхарам мікрараёна і так было складана дабірацца ў цэнтр горада, а сёння гэта зрабіць яшчэ цяжэй. Пастаянныя спазненні аўтобусаў і маршрутных таксі, таму што трэба рабіць аб’езд па дрэннай дарозе, пыл – усё гэта кожны дзень іх засмучае. Па высвятленне пытання рамонту моста мы звярнуліся да намесніка старшыні райвыканкама С. В. Пятроўскага.

– Сяргей Віктаравіч, адкажыце, калі ласка, колькі часу будзе весціся рэканструкцыя моста?

– Згодна з тэхнічным пашпартам аб’екта, рамонт моста ажыццяўляецца 11 месяцаў. У жніўні 2011 былі распачаты работы. Лічыце самі: у ліпені 2012 яны павінны завяршыцца. Але ў кожнай справе ёсць свае асаблівасці. Так, своечасовы рамонт будзе праведзены з умовай рытмічнага фінансавання, а калі грошай няма, спыняецца і работа.

–А за якія сродкі і адкуль ажыццяўляецца фінансаванне гэтага аб’екта?

– Фінансаванне вядзецца за кошт сродкаў абласнога бюджэту, на гэтыя мэты запланавана выдаткаваць каля 2,4 мільярда рублёў.

– Якая арганізацыя займаецца рэканструкцыяй аб’екта?

– Заказчыкам з’яўляецца КУП “Добрушскі камунальнік”, падрадчыкам – філіял “Мостабуд упраўленне №4” РУП “Мостабуд”. Менавіта гэтай арганізацыі было даручана выканаць работы па добрушскім мосце, бо яна добра сябе зарэкамендавала пры будаўніцтве такіх жа аб’ектаў у Гомелі, напрыклад, моста праз Сож.

– Якім ён будзе, мост паміж “Меліяратарам” і фарфоравым заводам па вуліцы Фрунзе?

– У першую чаргу, ён будзе бяспечным. Усім вядома, што ранейшы мост знаходзіўся ў аварыйным стане. Кожны дзень небяспека пагражала кожнаму транспартнаму сродку, які праязджаў па ім. Новы мост будзе і выглядаць па-новаму. Яшчэ трэба адзначыць, што ў бліжэйшыя дні будзе разгледжана пытанне руху гарадскога транспарту. Зіма і вясна пройдуць непрыкметна, і жыхары горада і раёна з задавальненнем будуць ездзіць па абноўленых вуліцах новых мікрараёнаў і па новым бяспечным мосце.

Анастасія АСАДЧАЯ