Яны – дарослыя!

Да таго дня, як у раёне 4 гады назад пры тэрытарыяльным цэнтры сацыяльнага абслугоўвання насельніцтва адкрылася аддзяленне дзённага знаходжання для інвалідаў, у людзей з асаблівасцямі псіха-фізічнага развіцця з’явіліся магчымасці для самарэалізацыі, раскрыцця індывідуальных здольнасцей. А галоўнае – вырашана праблема дэфіцыту стасункаў, з’явіліся ўмовы для адаптацыі ў грамадстве.

Аб выніках работы аддзялення за першыя чатыры гады свайго існавання расказвае загадчыца аддзялення Ірына МАКЕЕНКА:

-Да нас штодня прыходзяць дзеці-інваліды і маладыя людзі з асаблівасцямі развіцця, якія жывуць не толькі ў Добрушы, але і ў вёсках Насовічы, Жгунь, Мар’іна, пасёлку Рассвет. У аддзяленні яны атрымліваюць навыкі, неабходныя для далейшага паўнацэннага жыцця: гатуюць ежу, вучацца весці дамашнюю гаспадарку, шыць на машынцы, працаваць на камп’ютары. Захапленне жыхароў і гасцей нашага горада выклікаюць вырабленыя рукамі не зусім здаровых, але надзеленых пачуццём густу людзей крэатыўныя рэчы з нітак, прыроднага матэрыялу, бісеру, гіпсу, якія выстаўляюцца на гарадскіх кірмашах, фестывалях, іх кожны дзень можна ўбачыць у нашым цэнтры.

Заняткі з нашым псіхолагам аказваюць станоўчы ўплыў на псіхіку маладых людзей, дапамагаюць ім справіцца з праблемамі ў паводзінах і наладзіць адносіны з равеснікамі і дарослымі.

З вясны да позняй восені кіпіць работа на тэрыторыі вакол цэнтра – пры дапамозе навыкаў работы на зямлі праводзіцца працоўная тэрапія. Падрыхтаваць да пасадкі насенне, вырасціць рассаду, высадзіць яе на клумбы і градкі, прапалоць, паліць, а потым назіраць за ростам раслін – усё гэта нашым выхаванцам прыносіць радасць, яны задаволены тым, што ўносяць часцінку сваёй працы ў азеляненне роднага горада.

А самае галоўнае – бацькі пачынаюць верыць у здольнасці сваіх дзяцей, хочуць бачыць іх актыўнымі і шчаслівымі, нягледзячы на праблемы са здароўем.

Мы ж, работнікі цэнтра, будзем рады дапамагчы ўсім сем’ям нашага раёна, якія выхоўваюць дзяцей з асаблівасцямі псіха-фізічнага развіцця, і гатовы прыняць у аддзяленне дзённага знаходжання для інвалідаў тых, хто хоча займацца творчасцю, знайсці сяброў, прымаць актыўны ўдзел у жыцці горада.