Мікраклімат

Гандлёвы павільён “Вербачка”, які належыць прыватнаму прадпрыемству “Ніксан Плюс”, за паўтара года свайго існавання паспеў заваяваць папулярнасць у дабрушан не толькі дзякуючы выгаднаму размяшчэнню амаль у цэнтры горада. Прадаўцы ў “Вербачцы” вельмі шчырыя. Часам, каб узняць настрой, спецыяльна заглядваю ў павільён, каб удыхнуць паветра добразычлівасці, ветлівасці: пакупнікам тут заўсёды рады.

- Такі дружны калектыў, як у нас, яшчэ трэба пашукаць, – жартавала загадчыца павільёна Марына Давыдава (на здымку справа). – Вось ужо сапраўды на работу ідзём з радасцю, нібы на сустрэчу з сябрамі, якіх не бачылі даўно.

Дзяўчаты-прадаўцы не толькі добрыя сяброўкі, але і выдатныя спецыялісты. Марына Давыдава, напрыклад, у гандлі працуе з 2010 года і мае прафесію таваразнаўцы. Вышэйшую гандлёвую адукацыю мае і Марына Алейнікава (на здымку злева). Алеся Амелькіна (у цэнтры) ў павільёне працуе ўсяго каля года, але ні ў чым не ўступае калегам.

Паліцы павільёна ніколі не бываюць пустымі, нават калі ў горадзе адчуваецца недахоп пэўных тавараў, у “Вербачцы” ёсць ўсё, ды яшчэ і на выбар. Адных толькі каўбас у халадзільніку выкладзена столькі, што на роўных можна паспрачацца з магазінам Гомельскага мясакамбіната.

– Аб пакупніку мы клапоцімся, – расказвае Марына Давыдава. – Даўно заваявалі давер у соцень гараджан, а таму стараемся, каб за прадуктамі, хлебам, кандытарскімі вырабамі, напоямі ім не даводзілася бегаць па розных магазінах. На сярэдняга пакупніка разлічаны і цэны, хаця ў наяўнасці як самыя танныя, так і больш дарагія прадукты харчавання.

Штодзень павільён наведвае стваральнік прадпрыемства Сяргей Казлоў, аднак, не з мэтай кантролю. Бізнесмэн праводзіць маніторынг тавараў у “Вербачцы”, “Меркурыі” і яшчэ ў адным сваім павільёне, які знаходзіцца ў Ветцы, выслухоўвае пажаданні прадаўцоў і пакупнікоў. Чакаюць дзяўчаты Сяргея і ў нядзелю. Традыцыйна наймальнік віншуе сваіх работнікаў з усімі святамі. Дробязь, але прыемная.

Сяргей ЧАЙДАК