Крымінальны

Непрацуючы жыхар Васільеўкі Н., рыхтуючыся да зімы, залез у дом аднавяскоўкі і вынес з яго 8 трохлітровых слоікаў для закатак.

На гэтым злачынца не спыніўся. Праз дзень, дзякуючы яго намаганням, з аднаго з дамоў зніклі дзве секцыі чыгунных батарэй ацяплення, кампрэсар ад халадзільніка і дзверцы ад ацяпляльнага катла.

“Калега” Н. па крымінальным бізнесе знёс з дачнага дома хамут і аброць для каня, 10 метраў вяроўкі і клешчы. Навошта, засталося загадкай.

Пілі тры таварышы

Чарговая папойка трох дабрушан скончылася лаянкай, а потым бойкай, як кажуць “двое супраць аднаго”. Пацярпелы быў дастаўлены ў раённую бальніцу з цяжкімі цялеснымі пашкоджаннямі і праз некаторы час памёр.

Што не падзялілі ўдзельнікі бойкі, патлумачыць яны не маглі. Поўны малюнак таго вечара аднаўляюць следчыя.

Схадзіла дзяўчынка ў госці

На паведамленне з Церахоўскай бальніцы аб знікненні непаўнагадовай пацыенткі супрацоўнікі міліцыі адрэагавалі імгненна: пошук дзяўчынкі пачаўся праз хвіліну пасля тэлефоннага званка ў дзяжурную службу.

Высветлілася, што 13-гадовая пацыентка збегла з дому і ў той жа дзень па просьбе настаўніка школы была змешчана ў бальніцу, дзе знаходзіліся яе сёстры і браты, адабраныя ў маці адпаведнай службай. Пошукі вынікаў не прынеслі, а неўзабаве ў палаце з’явілася і віноўніца здарэння. З неразуменнем яна глядзела на міліцыянераў: маўляў, схадзіла ў госці да знаёмых у суседнюю вёску, што тут такога?

Тавары “едуць” за мяжу

Валютныя праблемы і разрыў у цэнах на тавары ў Беларусі і Расіі аднавілі забыты “чалночны” бізнес. Толькі на гэты раз беларусы вязуць тавары не на Радзіму, а за мяжу.

За адзін толькі дзень на пункце пропуску “Селішча” праваахоўнікі затрымалі два мікрааўтобусы з грузам беларускага цукру. Жыхары Гомеля спрабавалі незаконна, не маючы пасведчання прадпрымальнікаў, вывезці ў Расію 134 мяхі цукру агульным коштам каля 32 мільёнаў беларускіх рублёў.

Праз некалькі дзён у рукі міліцыі трапіў яшчэ адзін гора-камерсант. У яго аўтамабіле знайшлося 820 кілаграмаў цукру і 50 веласіпедных пакрышак. Кошт канфіскаванага груза склаў 4,1 мільёна рублёў.

Сяргей ЧАЙДАК