Влюбиться в магию восточного танца

Павольныя рухі, грацыёзная пластыка, экзатычная музыка – і ты міжволі апынуўся ў незнаёмай краіне. Нечакана трапляеш туды, дзе мова эмоцый – танец, замест слоў – рухі.
Беларускія дзяўчаты, быццам арабскія казачніцы, заваражылі сваімі выступленнямі гледачоў, якія прыйшлі на справаздачны ўрок па танцы жывата студыі фітнэсу, што ў Кобрынскім Палацы культуры.
- Наша студыя працуе з 2011 года, – расказвае яе кіраўнік Таццяна Алексяюк. – Сёння трэці па ліку справаздачны ўрок, традыцыйна нашы ўдзельніцы паказваюць, чаму навучыліся за год. У канцэрце выступаюць амаль 30 чалавек, усяго ўсходнімі танцамі займаюцца амаль 50. Узрост удзельніц самы розны – ад маладых дзяўчат да сталых жанчын.
Як паведаміла Таццяна Уладзіміраўна, самае складанае – гэта першыя заняткі. Узровень падрыхтоўкі ва ўсіх розны, але калі рэгулярна наведваць урокі, то ўжо праз 3-4 месяцы ўсе выходзяць на адзін узровень.
- Навучыцца танцаваць можа кожны, было б жаданне. Не залежыць гэта і ад узросту, напрыклад, мне ўжо хутка на пенсію, – гаворыць Святлана Басюк. – Заняткі наведваю другі год. Яны даюць упэўненасць у сабе, прыгажосць у рухах, пластычнасць, грацыю, паляпшаюць стан здароўя.
Прыгажуні прымаюць удзел у многіх канцэртах, якія ладзяцца ў горадзе і раёне. Актыўнымі ўдзельніцамі выступленняў з’яўляюцца Дыяна Свеціч, Крысціна Аракіян, Таццяна Страпухіна, Валянціна Чакавая і іншыя.
Закахаўшыся ў магію ўсходняга танца, спяшаюцца ўдзельніцы студыі на рэпетыцыі, пакідаюць хатнія справы, забываюць пра жыццёвыя турботы.
- Глядзіце, мы ўсе прыходзім сюды пасля работы, займаемся ў сваё задавальненне. Тут прыемная музыка, добразычлівая атмасфера, – дзеліцца сваімі ўражаннямі Алена Жук. – Калі нешта не атрымліваецца, кожны гатовы прыйсці на дапамогу.
Асабісты свет нашых гераінь выражаецца не толькі ў танцы, але і ў адзенні. Касцюмы ручной працы – гонар кожнай удзельніцы. Да гэтай справы яны ставяцца па-жаночаму – каб было прыгожа і прывабна.
Ірына ЛЕСІК.
Фота аўтара.