Сегодня призывник, завтра – солдат

Спачатку 42 будучыя салдаты, якія будуць праходзіць тэрміновую ваенную службу і службу ў рэзерве ў часцях Брэста, Аколіцы (што пад Мінскам), Баранавіч, Слуцка, Слоніма, сабраліся ля будынка раённага ваеннага камісарыята і пад гукі марша калонай прайшліся па вуліцах горада. Потым адбылося ўскладанне вянка да помніка воінам, загінуўшым у гады Вялікай Айчыннай вайны. Пасля гэтага прызыўнікі былі запрошаны ў актавую залу гарадскога Дома культуры на галоўную частку мерапрыемства — уручэнне павестак для праходжання службы ў арміі.

Першым да юнакоў звярнуўся намеснік старшыні раённага выканаўчага камітэта Сяргей Вітальевіч Сарокаў. Ён нагадаў пра асноўныя армейскія паняцціі — гонар, дысцыпліну, паслухмянасць, адказнасць, а таксама  пажадаў рабятам з годнасцю служыць на карысць сваёй Радзімы і вярнуцца дадому ўжо сапраўднымі мужчынамі. С. В. Сарокаў уручыў павесткі 7 будучым салдатам, якія будуць праходзіць ваенную службу ў элітных войсках г. Брэста.

Потым рабят благаславіў настаяцель Храма Свяціцеля Ціхана, протаіерэй Пётр Піліпчук, які нагадаў, што абарона Радзімы — гэта свяшчэнны абавязак кожнага салдата.

Да прызыўнікоў са сваімі пажаданнямі і наказамі служыць годна звярталіся старшыня раённай арганізацыі воінаў-інтэрнацыяналістаў Юрый Уладзіміравіч Шабунін, выконваючы абавязкі начальніка РАУС Аляксей Генадзьевіч  Яроменка, першы сакратар райкама ГА “БРСМ” Аляксандр Ануфрыевіч Занька і ваенны камісар раёна Валерый Іванавіч Касянюк, якія таксама ўручалі рабятам павесткі.

Не толькі салдатам цяжка падчас службы. Бадай, яшчэ цяжэй чакаць сваіх сыноў з арміі іх мамам. З пажаданнямі здароўя, цярпення, годнай службы і ў любой сітуацыі заставацца людзьмі да прызыўнікоў звярнулася  маці аднаго з іх Ала Мікалаеўна Скарагод.

Уся святочная цырымонія ўручэння павестак рабятам суправаджалася музычнымі нумарамі ў выкананні артыстаў мастацкай самадзейнасці раёна.

Як паведамілі ў раённым ваенным камісарыяце, адпраўка маладых салдат у ваенныя часці пачнецца 15 мая і працягнецца да 28 мая.

Уладзімір САКАЛОЎ.