СК «Медведь» за здоровый образ жизни

У прафліцэі прайшоў адзін з этапаў прафілактычнай праграмы па барацьбе са шкоднымі звычкамі, арганізаваны СК “Мядзведзь” пры падтрымцы маладзёжнага дабрачыннага грамадскага аб’яднання “Горад без наркотыкаў”.

Асноўнымі мэтамі гэтага аб’яднання, акрамя прафілактычнай і прапагандысцкай работы, з’яўляецца прыцягненне ў свае рады як мага большай колькасці маладых людзей, каб разам змагацца з найбольш глабальнымі праблемамі сучаснасці. Актывісты “Горада без наркотыкаў” небеспаспяхова папрацавалі ў навучальных установах Мінскай вобласці, а на Брэстчыне наш раён знаходзіцца ў ліку першых, дзе аб’яднанне разам з СК “Мядзведзь” прадставіла асветніцкую праграму.

На адным з пасяджэнняў камісіі па справах непаўналетніх старшыня спартыўнага клуба “Мядзведзь” Аляксандр Аляксандравіч Дулік у мэтах барацьбы супраць наркаманіі, алкагалізму, тытунекурэння і вырашэння іншых праблем сучаснай моладзі прапанаваў кіраўніцтву прафліцэя сельгасвытворчасці пасупрацоўнічаць.

І вось на працягу трох дзён навучэнцы першага  курса слухалі лекцыі, глядзелі відэасюжэты, слайд-шоу, актыўна абмяркоўвалі пачутае і ўбачанае. Першакурснікі знаходзяцца якраз у такім узросце, калі толькі пакінулі сцены школы, аднак па-сапраўднаму дарослымі яшчэ не сталі. Таму зараз для іх вельмі важна зрабіць правільны выбар у жыцці і не паддацца на спакусы ў выглядзе шкодных звычак.

У першую чаргу асновай асветніцкай праграмы з’яўляецца выхаванне маральнасці, духоўнасці сённяшняй моладзі, аднаўленне традыцыйных каштоўнасцей. Таму падчас лекцый у рабоце актыўны ўдзел прымаў памочнік настаяцеля Свята-Ціханаўскай царквы айцец Аляксей, а таксама намеснік старшыні камісіі па справах непаўналетніх райвыканкама Вольга Уладзіміраўна Антановіч.

Гэта быў толькі першы этап сумеснай работы СК “Мядзведзь”, “Горада без наркотыкаў” і прафліцэя. Па словах І. Д. Бужан, намесніка дырэктара па вучэбна-выхаваўчай рабоце прафліцэя. Ніводны чалавек пасля заняткаў не застаўся раўнадушным да вышэйзгаданых праблем. У перспектыве яшчэ некалькі этапаў работы з навучальнай установай, каб маладыя людзі на самай справе асэнсавалі, якую небяспеку нясе ўжыванне наркотыкаў, алкаголю, тытуню для здароўя чалавека.