Раздяловичи отмечены Грамотой и премией в 50 миллионов рублей

Па ўсёй краіне добраўпарадкаванню населеных пунктаў удзяляецца пастаянная ўвага. Гэта пытанне не сыходзіць з парадку дня і на Ганцаўшчыне. Утрыманне вытворчых і жылых пабудоў, тэрыторыі горада і вёсак, правядзенне мерапрыемстваў па стварэнні камфортных умоў для пражывання і працоўнай дзейнасці людзей з’яўляецца клопатам мясцовай улады, калектываў, насельніцтва. І, пэўна, мы не заўсёды задумваемся над тым, як выглядаем у параўнанні з іншымі населенымі пунктамі.

Абласны агляд санітарнага стану і добраўпарадкавання населеных пунктаў, што праводзіўся ў мінулым годзе, якраз і даў адказ на гэта пытанне. Рашэннем Брэсцкага абласнога выканаўчага камітэта вызначаны  пераможцы за 2012 год. За высокія паказчыкі, дасягнутыя ў ходзе правядзення абласнога агляду санітарнага стану і добраўпарадкавання населеных пунктаў, у ліку пераможцаў названы аграгарадок Раздзялавічы, які ўзнагароджаны Граматай Брэсцкага абласнога выканаўчага камітэта з уручэннем грашовай прэміі ў памеры 500 базавых велічынь, ці 50 мільёнаў рублёў. У згаданым вышэй рашэнні адзначана таксама вялікая работа, праведзеная мясцовымі выканаўчымі і распарадчымі органамі па добраўпарадкаванні шэрага гарадоў, сярод якіх і нашы Ганцавічы.

Чым заслужылі Раздзялавічы такое прызнанне? Гэта пытанне было адрасавана старшыні Хатыніцкага сельвыканкама Генадзю Аляксандравічу Перашчуку, які расказаў:

— На агляд была прадстаўлена інфармацыя аб тым, якія перамены адбыліся ў вёсцы ў сувязі з наданнем ёй статусу аграгарадка і якія прымаліся меры,  накіраваныя на падтрыманне і паляпшэнне ўмоў сельскага жыцця. У гэтай сувязі асабліва хацелася б адзначыць намаганні калектываў Раздзялавіцкай сярэдняй школы на чале з дырэктарам Марыяй Васільеўнай Рабцэвіч, ясляў-сада № 11 на чале з загадчыцай Жаннай Іванаўнай Рабцэвіч, зацікаўлены падыход у рабоце з насельніцтвам старасты Мікалая Міхайлавіча Шапялевіча. Свой уклад уносіць РЖКГ, сіламі якой абкошваецца тэрыторыя ля шматпавярховых дамоў, рэгулярна вывозіцца на звалку бытавое смецце. Пэўныя намаганні прадпрымаюць іншыя калектывы, самі жыхары. Словам, стараліся сумесна. У планах — новыя задумы, каб аграгарадок і надалей выглядаў дастойна.

Мікалай ЛОЙКА.