Какие лекарства более эффективны?

Дай вам Бог здароўя – гэта, пэўна, самае важнае пажаданне для кожнага чалавека. Бо пахіснецца здароўе — тут жа ўзнікнуць розныя праблемы. І калі сітуацыя не вострая, спрабуем дапамагчы сабе самі. А калі трывожымся пра магчымыя наступствы або разумеем, што лепш перасцерагчыся, то паказваемся і давяраемся ўрачу, верым у магічную сілу выпісаных ім лекавых сродкаў. З рэцэптам спяшаемся ў аптэку і настойліва патрабуем даць нам тое, што там прапісана.

Хто мае на руках ільготны рэцэпт, атакуе яшчэ настойлівей. І здзіўляецца іншы раз, атрымліваючы таблеткі ці іншыя лекі не “той” назвы. Тут ужо і да скандалу недалёка. Такія выпадкі, на жаль, бываюць, пакідаючы непрыемны след сапсаваным настроем работнікам аптэкі і ўпэўненасцю наведвальніка, што яго быццам бы спрабавалі падмануць. Няпраўда гэта! — парыруюць іх прэтэнзіі спецыялісты. Чаму? Давайце разам заглянём на “кухню здароўя”.

Адкуль “растуць” лекі 

Тое, што медработнікі карыстаюцца ў напісанні лацінскімі назвамі лекаў, зразумелая рэч. Дзякуючы гэтай універсальнай сістэме, беларускія, расійскія ці французскія, нямецкія, бразільскія ўрачы, як і з любой іншай краіны свету, разумеюць адзін аднаго, карыстаюцца аднымі і тымі ж лекамі, хоць называцца тыя могуць па-рознаму. Дасведчаныя людзі падлічылі, што ў запатэнтаванага прэпарата колькасць аналагаў на планеце можа даходзіць да двухсот-трохсот штук. Напрыклад, калі вы шукаеце но-шпу, а вам прапануюць біёшпу або вера-дротавярын, спазмол, спазманет, якія могуць на той момант быць у рэалізацыі,  гэта не спроба падману. Лекавы кампанент у іх адзін і той жа. Выйгрыш для хворага хутчэй у цане, у патрачаных грашах.

Краіны свету маюць сваю фармацэўтычную  вытворчасць.   Ды так ужо склалася, што асноўнымі пастаўшчыкамі на сусветны рынак субстанцый (зыходных матэрыялаў) з’яўляюцца Індыя, Кітай, Пакістан. Як паведамлялася ў адной з публікацый, для вытворчасці лекаў айчынная вытворчасць сінтэзуе 58 субстанцый, а яшчэ 827 — завозіцца.

Выпускам аналагаў запатэнтаваных лекаў займаюцца нават высокаразвітыя і багатыя краіны. У аснове беларускага, напрыклад, амбраксолу, нямецкага флавамеду, венгерскага халіксолу, грэчаскага лазалвану адно і тое ж актыўнае рэчыва. Толькі цана ад замежных вытворцаў больш “кусаецца”.

Вера ў замежныя цуды

Мне думаецца, гэта ідзе ў кожнага з дзяцінства. Верым, што там, за лініяй гарызонта, за межамі даступнага, нас чакае штосьці незвычайнае. І калі нездаровіцца, спадзяванне на цудадзейнасць менавіта імпартных прэпаратаў узрастае да небывалых памераў. Хаця закупляючы за рубяжом тыя ці іншыя гатовыя лекі, беларускія імпарцёры зыходзяць з рэальнай эфектыўнасці і патрэб краіны. Пэўна, і беларускія лекі, што пастаўляюцца на экспарт, таксама зарэкамендавалі сябе належным чынам — нездарма ж у Барысаўскага завода медпрэпаратаў у першым паўгоддзі мінулага года больш за палову з рэалізаваных лекавых сродкаў пайшло за рубеж. 

У аптэках нашага раёна прадстаўлена прадукцыя айчыннай вытворчасці і зарубежная. Якім лекам аддаць перавагу? Калі які-небудзь прэпарат у нас не выпускаецца,  то тут, як гаворыцца, выбіраць не даводзіцца. Калі ж на паліцах аптэкі ёсць аналагі, то рашэнне прадвызначаюць фінансавыя магчымасці чалавека. Заўважу толькі, што ў свеце ўсё больш і больш схіляюцца да высновы, што ўздзеянне таго ці іншага прэпарата на хворага ў значнай ступені залежыць ад індывідуальных асаблівасцей арганізма канкрэтнага чалавека. Аднаму і сваё дапаможа, а другому і імпартнае толькі трошкі. Паходжанне лекаў мае ўскосны ўплыў. Ды на тое і ўрач, каб кантраляваць працэс выздараўлення і карэкціраваць лячэнне.

Лекі па льготнаму рэцэпту —

у межах неабходнага і разумнага

Запаўняючы бланк ільготнага рэцэпта, расказвае загадчыца цэнтральнай  раённай аптэкі № 83 Кацярына  Рыгораўна Новік, урачы амаль заўсёды ўказваюць міжнародныя назвы лекаў. Ды трэба ведаць, што працэдура атрымання таго ці іншага прэпарата рэгулюецца пэўнымі правіламі. У адпаведнасці з главой 9 Закона Рэспублікі Беларусь ад 11.01.2002 г. “Аб ахове здароўя”, а таксама Палажэннем аб парадку бясплатнага і льготнага забеспячэння лекавымі і перавязачнымі матэрыяламі асобных катэгорый грамадзян (зацверджана Пастановай Савета Міністраў Рэспублікі Беларусь 30.11.2007 г. № 1650), па льготных і бясплатных рэцэптах выпісваюцца толькі лекавыя сродкі, што ўваходзяць у пералік асноўных лекавых сродкаў (зацверджаны Пастановай ад 26.03.2012 г. № 25 “Аб зацвярджэнні пераліку асноўных лекавых сродкаў”). Пастановай калегіі Міністэрства аховы здароўя ад 28.03.2008 г. № 4.1 “Аб лекавым забеспячэнні насельніцтва рэспублікі, парадку забеспячэння асобных катэгорый грамадзян лекавымі сродкамі на льготных умовах і бясплатна” рэгламентаваны наступны парадак іх водпуску з аптэк. У прыватнасці, водпуск з аптэк на бясплатных і льготных умовах лекавых сродкаў, выпісаных па міжнародных непатэнтаваных назвах, ажыццяўляецца ў наступным парадку: 1) лекавыя сродкі айчыннай вытворчасці (калі ў аптэцы ёсць у наяўнасці лякарства некалькіх айчынных вытворцаў, адпускаецца тое, што мае найменшую цану); 2) імпартныя лекавыя сродкі, закупляемыя па выніках рэспубліканскіх цэнтралізаваных конкурсаў (іншых відаў працэдур закупак); 3) лекавыя сродкі, што маюцца ў аптэцы па найменшай цане.

Словам, усе патрабаванні вытрыманы ў межах неабходнага і разумнага.

Мікалай ЛОЙКА.