Хороший урожай картофеля рассчитывают собрать в этом году в сельхозкооперативе «Огаревичи»

Восеньскай парой не меншае клопату ў працаўнікоў сяла. Здаецца, завяршылася жніво, але яшчэ шмат работы: вядзецца сяўба азімых культур і ўздым зябліва, завяршаецца ўборка кукурузы і нарыхтоўка кармоў, а таксама гэта час уборкі агародніны і бульбы. А сёлета “другі хлеб” урадзіў.

У СВК “Агарэвічы” з самага ранку суцэльным патокам сабраная з палёў бульба паступае на сартавальную станцыю, работнікі якой за змену перапрацоўваюць і закладваюць на захоўванне каля 150 тон насення гэтай сельгаскультуры. Сельгаскааператыў уваходзіць у рэспубліканскую праграму развіцця бульбаводства, і вытворчасць тут арыентавана галоўным чынам на вырошчванне насення бульбы элітных гатункаў для далейшага яе развядзення.

Як адзначае загадчыца мерыстэмнай лабараторыі сельгаскааператыва Наталля Муха, якая непасрэдна ўзначальвае службу па развядзенню і вырошчванню элітных гатункаў бульбы, у гэтым годзе яна ўрадзіла: сярэдняя ўраджайнасць звыш 250 цэнтнераў з гектара, прычым калі браць таварную бульбу, якая паступае на сталы спажыўцоў, то ўраджайнасць такіх яе гатункаў, як “журавінка” і “скарб”, значна перавышае і 300 цэнтнераў на круг.

Каб паспець убраць важкі ўраджай “другога хлеба”, на палях задзейнічаны адразу 3 бульбаўборачныя камбайны, адзін з якіх атрыманы па дзяржаўнай праграме ў лізінг зусім нядаўна. А поплеч з рабочымі шчыруюць і спецыялісты сельгаскааператыва. На поўную моц працуе і сучасная сартавальная станцыя на не так даўно пабудаваным бульбасховішчы ёмістасцю паўтары тысячы тон. І калі зараз на захоўванне закладваецца насенне, якое будзе запатрабавана сельгасвытворцамі вясной, то таварная бульба ідзе на продаж. Рынак дыктуе цэны, таму кошт яе невысокі — 900 рублёў за кілаграм. Ужо заключаны першыя дагаворы на аптовыя пастаўкі партнёрам. Ды і некандыцыйная прадукцыя запатрабавана, яе закупляе крухмальны завод у Снове. Туды адпраўляецца зараз бульба гатункаў “крыніца” і “альпініст”, а потым, пасля пераборкі, будзе пастаўляцца і бульба гатункаў “журавінка” і “здабытак”, багатых на крухмал, якога павінна ўтрымлівацца ў клубнях не менш за 15 працэнтаў.

Безумоўна, сёлета цэны на бульбу невысокія, але за кошт высокай ураджайнасці і якасці прадукцыі гаспадарка разлічвае істотна папоўніць свой бюджэт.

Павел СВІСТУНОВІЧ.

НА ЗДЫМКАХ: бухгалтар гаспадаркі Анастасія Волах разам з памочнікам машыніста бульбаўборачнага камбайна Сяргеем Каўшом на ўборцы бульбы; уборка бульбы ў СВК «Агарэвічы»

Фота аўтара.