В Ганцевичах прошла первая осенняя ярмарка

Восенню традыцыйныя кірмашы сельгаспрадукцыі ў райцэнтры карыстаюцца ў гараджан папулярнасцю. Людзі выкарыстоўваюць магчымасць назапасіць агародніну па больш таннай цане. Вось і ў мінулую суботу з самага ранку каля гарадскога рынку па вуліцы Кастрычніцкай было шматлюдна.

Прама з машын сваю прадукцыю прапанавалі 8 сельгаскааператываў раёна, а таксама фермерскія гаспадаркі і райспажыўтаварыства.

Як і ў мінулыя гады, вельмі бойка ішоў гандаль зернем, якое запатрабавана ў гараджан з прыватнага сектара, што трымаюць гаспадарку. І гэтую прадукцыю, цана на якую вагалася ад 2100 да 2320 рублёў, раскупілі літаральна на працягу гадзіны. Даволі добра разыходзіліся таксама бульба, капуста, морква і цыбуля. Кошт на іх у прадаўцоў не вельмі адрозніваўся, і пакупнікі больш увагі надавалі якасці. Парадавалі цэны на агуркі і памідоры, за якімі выстройваліся чэргі. Даволі бойка ішоў і гандаль рыбай, якую прапанаваў рыбгас “Лактышы”, чаму, безумоўна, спрыяла цана. Людзі з задавальненнем набывалі карпа па цане 20450 рублёў за кілаграм.

НА ЗДЫМКАХ: на кірмашы было шматлюдна; сельгаспрадукцыю многія набывалі мяхамі.

Трэба адзначыць, што пасля 10 гадзін рады гандляроў істотна парадзелі. У тых, у каго яшчэ заставаўся тавар, пачалі патроху зніжаць цэны. І пад канец кірмашу тую ж агародніну можна было набыць на 10 — 20 працэнтаў танней за першапачатковы кошт, чым і скарысталіся многія гараджане.

Зрабіўшы неабходныя пакупкі, тут жа, на кірмашы, мелася магчымасць адпачыць за столікамі райспажыўтаварыства, якое арганізавала вулічнае кафэ, пад гукі аркестра гарадскога Дома культуры, які ўладкаваўся на пляцоўцы ля будынка ЗАГСа.

Пасля наведвання кірмашу ўсё ж такі засталося нейкае пачуццё незадаволенасці, бо былі спадзяванні на больш нізкі кошт сельгаспрадукцыі, а цана на яе па некаторых пазіцыях вышэй, чым на звычайным рынку ў тых жа Баранавічах. Безумоўна, тут вялікую ролю адыгрываюць попыт і прапанова. У буйным горадзе гандляроў сельгаспрадукцыяй хапае — адсюль канкурэнцыя, а вялікі паток пакупнікоў дае магчымасць зарабіць ім за кошт абароту. Але на тое і арганізоўваюцца восеньскія кірмашы, каб даць магчымасць людзям назапасіць сельгаспрадукцыю па больш нізкай цане.

Павел СВІСТУНОВІЧ.

Фота аўтара.