Собрание кредиторов состоялось на КУПП «Ганцевичский КПД»

Крэдыторы КУВП “Ганцавіцкі КПД”, якія 31 жніўня сабраліся на сход, цікавіліся станам спраў на прадпрыемстве, якое, як вядома, праходзіць працэдуру санацыі. Што зроблена ўжо для таго, каб яно цвёрда стала на ногі, аднавіла плацежаздольнасць і нарошчвала вытворчасць? Пра цяперашняе становішча прадпрыемства, пра развіццё сітуацыі на працягу апошніх гадоў грунтоўна і падрабязна, пацвярджаючы мноствам лічбаў, расказаў у сваёй справаздачы ўпраўляючы ў вытворчасці па справе аб банкруцтве, доктар эканомікі Мікалай Аляксандравіч Клімчук.

У асартыменце прадпрыемства 182 назвы прадукцыі, якая выкарыстоўваецца для мантажу сучасных жылых дамоў. Партфель заказаў сфарміраваны немалы, і ён забяспечыць калектыву стабільную работу да канца гэтага года і ў першай палове наступнага. Тэндэнцыя аздараўлення прадпрыемства становіцца ўсё больш відавочнай. За мінулы год выпушчана 14584 кубічныя метры жалезабетонных вырабаў, аб’ём таварнай прадукцыі склаў 15 мільярдаў 309 мільёнаў рублёў. Першая палова сёлетняга года прынесла наступныя вынікі: выпушчана 4513 кубаметраў жалезабетонных вырабаў, аб’ём таварнай прадукцыі склаў 10 мільярдаў 502 мільёны рублёў. Рэнтабельнасць рэалізацыі прадукцыі з пачатку года дасягнула ўжо 7,9 працэнта. Усё разам узятае сведчыць аб тым, што прадпрыемства на плаву. Галоўнае — не ўпусціць ініцыятыву, своечасова рэагаваць на патрэбы рынку, надаць пазітыўным зрухам пастаянную дынаміку.

Разам з тым Мікалая Аляксандравіча турбуе знос абсталявання, дэфіцыт кадраў некаторых спецыяльнасцей, параўнаўча невысокія заробкі людзей. Каб прадпрыемства магло зноў акумуляваць работнікаў высокіх прафесійных якасцей, як гэта было ў лепшыя для КПД гады, крэдыторы згадзіліся з неабходнасцю павышэння аплаты працы работнікаў прадпрыемства.

Увогуле, сабраўшыеся станоўча ацанілі праведзеную Мікалаем Аляксандравічам Клімчуком работу і для яе завяршэння яшчэ на год прадоўжылі яго паўнамоцтвы. А гэта значыць, што ў прадпрыемства ёсць рэальная перспектыва стаць адным з лепшых на тэрыторыі Ганцаўшчыны і працаваць на ім зноў будзе не менш прэстыжна, чым у самыя спрыяльныя гады яго існавання.

НА ЗДЫМКУ: на сходзе крэдытораў аб справах вытворчых і фінансавых дакладвае ўпраўляючы Мікалай Аляксандравіч Клімчук (у цэнтры).

Тэкст і фота

Мікалая ЛОЙКІ.