Выпускник ганцевичской гимназии вернулся с международной олимпиады бронзовым призёром

З 21 па 27 жніўня ў нямецкім горадзе Кёльне прайшла 9-я Міжнародная алімпіяда па геаграфіі. Прыемна, што ўдзел у ёй прыняў і выпускнік гімназіі горада Ганцавічы Аляксей Кірыковіч. Выступленне нашага земляка атрымалася паспяховым: з Германіі ён вярнуўся з бронзавым медалём. Сваімі ўражаннямі ад алімпіяды Аляксей падзяліўся з супрацоўнікам “СП” Уладзімірам САКАЛОВЫМ.

— Віншуем, Аляксей! Раскажы, калі ласка, што ўяўляла сабой 9-я Міжнародная алімпіяда па геаграфіі?

— Удзел у Міжнароднай алімпіядзе прынялі больш за 120 рабят з 32 краін свету. Яна складалася з трох этапаў: пісьмовай тэарэтычнай часткі, мультымедыйнага тэсту і палявога тура. Усе заданні для ўдзельнікаў падаваліся выключна на англійскай мове.

— Ты неаднаразова ўдзельнічаў у рэспубліканскіх алімпіядах. Можаш параўнаць іх з тым, што адбывалася ў Кёльне?

— Не скажу, што нешта выклікала ў мяне цяжкасці, тым больш, што я сур’ёзна рыхтаваўся да гэтай алімпіяды. Ды і мінулагодні вопыт выступлення ў Мадэне ў нейкай ступені таксама дапамог. Але вось палявы тур, які прайшоў у Кёльне, быў складаным.

— У мінулым годзе ты прымаў удзел у 5-й Міжнароднай алімпіядзе навук аб Зямлі ў Мадэне? Моцна адрозніваецца арганізацыя гэтых мерапрыемстваў у Германіі і Італіі?

— Што датычыцца арганізацыі, то мне больш спадабалася ў Італіі. А так цяжка параўноўваць: гэта ўсё ж такі дзве розныя алімпіяды. Але вось, напрыклад, заданні на алімпіядзе ў Кёльне мне падаліся больш складанымі, чым у Мадэне.

— Чым займаліся ў вольны час? Ці давялося пазнаёміцца з рабятамі з іншых краін?

— У вольны час мы адпачывалі, гулялі па гораду. Усіх удзельнікаў дзялілі па групах і паказвалі розныя цікавыя і прыгожыя месцы Кёльна. Аднойчы для нас арганізавалі так званы “міжкультурны” вечар, дзе кожны мог прадставіць культуру сваёй краіны.

У Кёльне пазнаёміўся з рабятамі з іншых краін, але найбольш цесныя зносіны наладзіліся з расіянамі, а таксама ўсімі тымі, хто размаўляў на рускай мове. Сярод іх былі не толькі прадстаўнікі краін былога СНД, але і некаторыя румыны і харваты.

Дарэчы, Кёльн вельмі спадабаўся. Гэты горад па-сапраўднаму можна назваць маладзёжным. Столькі моладзі на вуліцах няма, здаецца, нават у Мінску.

— Ты паступіў у Беларускі дзяржаўны ўніверсітэт на спецыяльнасць “геалогія”. Твае мары спраўдзіліся. А якія планы на будучыню?

— Так, я сапраўды хацеў паступіць менавіта ў БДУ на гэтую спецыяльнасць. І я вельмі задаволены. А што датычыцца планаў на будучыню, то яны звязаны выключна з вучобай. Далёка загадваць не хочацца.

— Аляксей, яшчэ раз віншуем цябе з паспяховым выступленнем і жадаем поспехаў у далейшым!

— Дзякуй!

НА ЗДЫМКУ: Аляксей Кірыковіч з бронзавым медалём з Кёльна.

Фота Уладзіміра САКАЛОВА.