Удзел Ганцавіцкага раённага Дома рамёстваў у абласным свяце роднай мовы «Жывыя вытокі»

21 лютага Ганцавіцкі раённы Дом рамёстваў разам з дзіцячым фальклорным калектывам “Раўчукі”, народным фальклорна-этнаграфічным гуртом “Завіца” Раздзялавіцкага СДК прадставілі Ганцавіцкі раён на абласным свяце роднай мовы “Жывыя вытокі”, якое прайшло ў Брэсцкім абласным грамадска-культурным цэнтры.

Мэтай гэтага свята з’яўляецца прыцягненне ўвагі грамадства да роднай мовы, а таксама павышэнне цікавасці да лепшых традыцый нацыянальнага адзення, знаёмства з асаблівасцямі традыцыйнага касцюма Брэстчыны.

Падчас мерапрыемства адбылася прэзентацыя фотакаталога  “Рэгіянальныя асаблівасці традыцыйнага касцюма Брэстчыны”, у якім сабрана больш за 100 арыгінальных касцюмаў з 15 раёнаў вобласці, у тым ліку Ганцавіцкага раёна. Таксама была зладжана выстава адноўленых і стылізаваных строяў, дзе Ганцавіцкі і Маларыцкі раёны прадставілі свае калекцыі  адзення. Ад Ганцавіцкага раёна калекцыю стылізаваных касцюмаў прадставілі майстры  Ганцавіцкага раённага Дома рамёстваў. Тканыя ці вышываныя жаночыя і мужчынскія сарочкі, спадніцы, паясы, заплечнікі і торбы – усё гэта змаглі ўбачыць наведвальнікі выставы. За захаванне і папулярызацыю народных строяў і ўдзел у абласным свяце роднай мовы “Жывыя вытокі” Ганцавіцкі раённы Дом рамёстваў быў узнагроджаны Ганаровай граматай.

У межах свята роднай мовы адбыўся этнаграфічны канцэрт-паказ аўтэнтычных і адноўленых касцюмаў “Модны стыль – народны тэкстыль”. Для гледача гэта была ўнікальная магчымасць убачыць каля 200 народных касцюмаў і  непаўторных элементаў самабытнага адзення. Адмысловае адзенне, багата арнаментаванае абярэжнымі ўзорамі, прадэманстравалі ўдзельнікі дзіцячага фальклорнага калектыву “Раўчукі” (кіраўнік Раман Сімановіч) Раздзялавіцкага СДК: Дзіяна Варвашэвіч, Таццяна Рабцэвіч, Яна Русакевіч, Вераніка Купрэйчык, Ангеліна Крупеніч, Алёна Васілевіч, Юлія Валуевіч, Яўген Ланец і Андрэй Рабцэвіч пад самабытныя спевы народнага фальклорнага-этнаграфічнага гурта “Завіца” (кіраўнік Людміла Рабцэвіч) Раздзялавіцкага СДК, падчас дзівоснай вясельнай традыцыі, якая  дайшла да нашых дзён — апрананне маладой.

Напрыканцы свята ўдзельнікі этнаграфічнага канцэрта-паказу аўтэнтычных і адноўленых касцюмаў “Модны стыль – народны тэкстыль” Ганцавіцкага раёна былі ўзнагароджаны Ганаровай граматай за захаванне і папулярызацыю народных строяў і ўдзел у абласным свяце роднай мовы “Жывыя вытокі”.  Ганаровай граматай за актыўны ўдзел у абласным свяце роднай мовы “Жывыя вытокі” таксама быў узнагароджаны народны фальклорны-этнаграфічны гурт “Завіца” Раздзялавіцкага СДК (кіраўнік Людміла Рабцэвіч).

Наталля Білімава,

малодшы навуковы супрацоўнік Ганцавіцкага раённага Дома рамёстваў