Пытанні ў сферы гандлю

На мінулым тыдні ў рэдакцыю раённай газеты “Савецкае Палессе” патэлефанавалі дзве жанчы­ны. Іх пытанні тычыліся работы раённага спажы­вецкага таварыства. Карэспандэнт “СП” Галіна Пупач звярнулася па каментарыі да старшыні райспажыўтаварыства Аляксандра Кулака.

Жыхарка горада Ганцавічы Зінаіда ВАЛЕЦКАЯ выказала занепакоенасць тым, што магазін “ Эканом”, які знаходзіцца па вуліцы Гагарына, па словах людзей-суседзяў, у хуткім часе будзе зачынены. Жанчына расказала, што магазін вельмі не­абходны ў гэтай частцы горада, тут добрае абслугоўванне і тавары можна купіць са зніжкамі, а ўсё гэта немалаважна для людзей шаноўнага ўзросту.

Аляксандр КУЛАК: “Да канца бягучага года закрыццё магазінаў у райцэнтры і населеных пунктах Ганцаўшчыны не плануецца. А што будзе далей — пакажа час”.

Стэла МЕЛЕХАВЕЦ, жыхарка вёскі Ганцавічы, расказала аб добрай рабоце, багатым асартыменце тавараў і ветлівым прадаўцу магазіна, які знаходзіцца за горадам, на трасе Ган­цавічы — Лунінец. Аднак, па словах Стэлы Францаўны, у ма­газіне вельмі холадна. З-за нізкай тэмпературы там нельга затрымацца надоўга, а бывае так, што трэба пакупнікам чакаць прывозу свежага хлеба, малочных прадуктаў і г.д.

Аляксандр КУЛАК: “Ацяпленне магазіна ажыццяўляецца распаўсюджаным зараз спосабам — падключэнне “газавай пушкі”. Паколькі некалькі гадоў таму плошчы магазіна былі павялічаны, пасля закрыцця і аб’яднання з нерэнтабельным прыдарожным кафэ, магчыма, высокай плюсавой тэмпера­туры няма. Падключыць жа туды газавае ацяпленне не да­зваляе фінансавае становішча раённага спажывецкага та­варыства. Аднак з цвёрдай упэўненасцю магу канстатаваць, што ўсе ўмовы для эфектыўнай работы гандлёвай кропкі там створаны”.